Sešu Latgolys kulturys pīminekļu atjaunuošonai i uzlobuojumu veikšonai tymūs pīškierts Eiropys Savīneibys leidzfinansiejums. Atjaunuošonys dorbus veiks Daugovpiļs cītūksnī, Aglyunys bazilikā, Slutišķu staraveru sādžā, Ludzys piļsdrupuos, Preiļu muižys kompleksā i Kruoslovys piļs Omotu sātā, informej Kulturys ministreja.

22. martā tyka nūslāgta vīnuošonuos par Eiropys Regionaluos atteisteibys fonda (ERAF) leizdfinansāta projekta “Rīteiropas vērtības” eistynuošonu. Vīnuošonūs paraksteja projekta īsnīdziejs – Daugovpiļs piļsātys dūme. Tuos sadarbeibys partneri projektā ir Daugovpiļs nūvoda dūme, Kruoslovys nūvoda dūme, Ludzys nūvoda pošvaļdeiba, Preiļu nūvoda dūme i Aglyunys bazilikys draudze Aglyunys nūvodā.

Projekts paredz atjaunuot i atteisteit sešus vaļsts nūzeimis kulturys pīminekļus, kuri atsarūn popularuokajā Latgolys turisma maršruta lūkā. Projekta eistynuotuoji paredziejušs styprynuot Latgolys kai turisma golamierķa pīviļceibu.

Daugovpiļs cītūksnī paradzāts atjaunuot Inženirarsenalu – vīnu nu itūšaļt vēļ tukšajom cītūkšņa ākom – i izveiduot tymā Daugovpiļs tehnikys i industrialuo dizaina muzeju. Aglyunys bazilikys tūrnī paradzāts izveiduot apskatis vītu, paverūt apmaklātuojim skotu iz Cireiša azara ainovu. Sovpus bazilikys telpuos maineis nakvalitativuos lūgu konstrukcejis, kas itūšaļt nanūdrūšynoj atbylstūšu īkšejū klimatu i būjoj bazilikys sīnu kruosuojumus. Restauracejis dorbi paradzāti ari Slutišķu staraveru sādžā Daugovys lūkūs, piec tūs veikšonys sādžā paradzāts izveiduot staraveru kulturys montuojuma centru i rodūšuos darbneicys.

Kruoslovys piļs Omotu sātā piec restraucejis dorbim tiks izveiduota ekspoziceja “Pi vīna golda”, kai ari īreikuota gleznuotuoja Valentina Zlidņa pīminis ustoba. Ludzys piļsdrupuos, kas sasaglobuojušs nu 14. g.s. caltuo Livonejis ordiņa atzora cītūkšņa, paradzāts veikt konservacejis dorbus, kab saglobuotu piļsdrupu tālu i apjūmu i pavārtu plašuokys īspiejis tūs izmontuošonai. Sovpus, turpynojūt Preiļu muižys kompleksa aizsardzeibys pasuokumus, muižys ākai izgataveis lūgus.

Viests sagataveita piec Kulturys ministrejis snāgtuos informacejis
Karteite: Kulturys ministrejis publicitatis materials