1. Itūgod festivals “Muzykys skrytuļs” nūtiks septeitū reizi.

Jaunuos muzykys festivals “Muzykys skrytuļs”, kai īrosts, nūtiks Daugovpiļs nūvoda Leiksnā, itūgod 14. i 15. julī. Festivals aizasuoce 2005. godā i piečuok nūtyka 2006., 2007., 2011., 2014. i 2016. godā. Festivals popularizej latgaliskū identitati, snādz atbolstu jaunajim autorim i izpiļdeituojim, sekmej dzīšmu radeišonu latgalīšu volūdā. Festivala idejis pamatvierteibys ir dzīšmu teksti latgaliski, pyrmatskaņuojumi i “dzeivais” izpiļdejums.

2. Festivala logo pamatā – skrytuļs.

Logo attāluotais skrytuļs simbolizej ari muzykys disku. Kotru godu festivala logo kruosa mainuos, 2018. godā tei byus zaļa i dzaltona. Suokūtnejuo festivala logo autors ir Jurs Viļums, bet 2014. godā tū atjaunuoja Aivars Bulis.

3. Festivala moto ir “Kruot var na tikai naudu!”.

Moto ir aizgiuts nu rakstnīka i literatirzynuotnīka Valentina Lukaševiča dzejis. Festivalam itys moto nav izvālāts najauši, tys pauž, ka “Muzykys skrytuļs” ir nakomercials pasuokums, festivals ir bezmoksys. Var kruot na tikai naudu, bet ari spylgtuokuos vosorys atminis! Taidys nūteikti byus festivala apmaklātuojim.

4. Māris Susejs – festivala nakts koncertu vadeituojs jau nu 2007. goda.

Māris Susejs ir eists Latgolys i ari “Muzykys skrytuļa” patriots. Mārim Leiksna ir īraksteita dzili sirdī, partū ka juo senči ir dzeivuojuši i struoduojuši taišni ite. Festivala “Muzykys skrytuļs” nakts aba rokkoncerts vaira nav īdūmojams bez Māra ospruoteigūs jūku.

5. Festivalā laikā nūteik “Muokslys skrytuļs”.

“Muokslys skrytuļs” nūteik jau nu 2007. goda ar mierki sekmēt muzykys i muokslys sinenergeju, kai ari pastuosteit par breineigim Latgolys muokslinīkim. Ar laiku itei aktivitate puorauga par plenerim. 2014. goda festivalā muokslinīki veiduoja dobys objektus Leiksnys muižys parkā, 2016. godā gleznuoja šmukūs Leiksnys skotus, bet itūgod muokslinīki radeis sovu dizainu i apgleznuos T kraklus, kurus koncertā duovynuos muzikim.

6. Festivals aizasuoce ar treis jaunīšu iniciativu.

Tuolajā 2005. godā treis jaunīšim Annai Briškai, Guntai Mežulei i Juram Viļumam roduos ideja sapulcynuot sovus draugus – muziķus nu Latgolys – uz kūpeigu pasuokumu. Tys puorauga nūpītnā festivalā, pulcynojūt muziķus, kuri roda i izpylda dzīsmis latgaliski. Pyrmajā godā festivalā beja ap 1000 apmaklātuoju, bet trešajā jau – 5000.

7. Festivala tuoluokais gosts – nu Australejis.

Paguojušajā festivalā (2016. godā) pīsadaleja Australejis latvīts Ivars Štubis. Ari itūgod jū varēs redzēt i dzierdēt iz “Muzykys skrytuļa” skotivis.

8. Festivalā postfolklorys grupa “Rikši” prezeņtēs jaunū albumu.

Itys – septeitais – festivals īsazeimēs ar vēļ nabejušu, atsevišķu koncertu – postfolklorys grupys “Rikši” jaunuo muzykys albuma prezentaceju. Storp cytu, “Rikši” festivalā pīsadola jau nu 2011. goda.

9. Itūgod “Muzykys skrytulī” uzastuos ap 30 grupuom.

Leiksnu 14. julī pīskandynuos ap 30 dažaidu grupu, kurys roda i izpylda dzīsmis latgaliski. Iz skotivis kuops taidys latgalīšu muzykys zvaigznis kai “Bez PVN”, “Dabasu Durovys”, “Latgalīšu reps”, “Metrs”, kai ari jaunī izpiļdeituoji “Žvūrgzdyni”, “Piparmētra”, “Unknown Artists” i  c. Festivalā pīsadaleis ari gosti nu uorezemu. Sekoj festivala jaunumim facebook.com i dreizumā izzynoj puorejūs dalinīkus.

10. Festivalā “Borowa MC” solists Aigars Runčis atsazeist mīlesteibā tūpūšajai sīvai.

Grupys “Borowa MC” lideram, pasuokumu i raidejumu vadeituojam Aigaram Runčim festivals “Muzykys skrytuļs” ir eipašs gon personeigajā, gon muzykalajā dzeivē. Par daleibu pyrmajā festivalā jis atguodoj, ka iz Leiksnu braukši ta taisnū nu pyrmuo albuma “Trepis iz nakurīni” īroksta Reigā i tymā vokorā pyrmū reizi klauseituojim tykuse atskaņuota dzīsme “Vysskaistuokajai meitiņai”. Publikā dzīsme naizraisejuse eipašu sajiusmu. “Nivīna aplausa, nivīns naprosa atkuortuot, tikai vīns ocu puors – muna meitine, nu jau sīveņa Agnese, vērēs iz mani i saprota, cik itei dzīsme ir maņ i jai nūzeimeiga. Tei ir dzīsme par jū i jai, dzīsme, kas pyrmū reizi skanēja Leiksnā – vītā, kur es jai praseju, voi byus muna meitine,” atguodoj Aigars.

Karteitis: publicitatis foto