3. majā, Imanta Ziedoņa 85. dzimšonys dīnā, Līpuojis koncertzalā “Lielais dzintars” nūtiks apbolvuojuma “Laiks Ziedonim” pīktuo cyldynuošonys ceremoneja. Nūvodpietnīceibys nominacejā “Kedas” izvirzeita Cyblys folklorys kūpa “Ilža”, bet nominacejā par dzeivi literatūra “Bize” izvirzeits stuostnīks, Baļtinovys amatirteatra “Palādas” akters Jezups Jermacāns.

Vēļ nominacejā “Kedas” apbolvuojumam izvirzeita bīdreiba “Vēsturisko rekonstrukciju studija “Rokoko””, nūdybynuojums “Mūzikas un mākslas atbalsta fonds”, muokslineica Zanda Puče, bīdreiba “Skaņumāja” i arhitekte Jana Jākobsone. Nominacejā “Bize” vēļ izvirzeitys Ventspiļs stuostneicys Aija Kaminska i Ārija Klēvere, stuostneica i gide nu Kuldeigys Liesma Lagzdiņa, stuostneica nu Rucovys Inga Tapiņa, stuostnīks nu Sventuojis Lītuvā Mikelis Balčus.

Cyblys folklorys kūpa “Ilža” izvirzeita apbolvuojumam par veikumu Ludzys igauņu muzykaluo montuojuma dokumentiešonā. “Ilžys” veikums naļaun nūgrimt aizmiersteibā Latgolā vairuokus godsymtus dzeivojūšuos etniskuos grupys dzīsmem, kas ir unikals folklorys montuojums. Igauņu volūdys pratieju vaira nav (pādejais nūmyra 2006. godā), bet pasasokūt Latvejis i Igaunejis folklorys ekspediceju vuokumam, volūda ir sasaglobuojuse fonetiski, i “Ilža” ļaun otkol tai skanēt – dzīsmēs, muzykā, autentiskā skaniejumā i modernā aranžejumā. “Ilža” ir vīneigais kolektivs bejušajā Ludzys rajonā, kas uzadrūšynuojs īdzeivynuot Ludzys pusē skaniejušū igauņu volūdu, da šam nivīns tū nav veics.

Kolektivs lepojās ar tū, ka puse tuo dalinīku ir Ludzys igauņu piecteči. Itūšaļt “Ilža” aktivi pīsadola Ludzys igauņu dzīšmu CD sagataveišonys procesā, jo tys ir storptautiska mārūga nūtykums – duovona Latvejai i Igaunejai obu vaļstu pastuoviešonys symtgadē.

Jezups Jermacāns ir na tikai stuostnīks i Baļtinovys amatirteatra “Palādas” akters, bet ari “Kronīšu” saiminīks, zemnīks, kurs kūpā ar dzeivisbīdri vuica cytim senūs orūdys – maizis cepšonu, ari sīra sīšonu. Jezupa stuostejums suleigā Baļtinovys pusis izlūksnē aizrauj sevkuru, par tū bīži viņ jis ir tys, kurs īvoda izruodi, izklaidejūt skateituojus. Jis ir cīši vīsmīleigs i atvārts, paruodūt latgalīšu lobuokuos tradicejis. Na veļti pi Jezupa gasteja Latvejis Nacionaluo teatra akteri, kab lobuok sasagataveitu lūmom izruodē “Latgola.lv”.

Nominacejā “Zemi es mācos” cyldynuos gudreibys tuoluoksaceituojus, kuri ir augstys raudzis profesionali kaidā nu tautsaimnīceibys nūzaru i lobpruot doluos ar sovu pīredzi. Itymā nominacejā izvirzeita Lilita Bērziņa, uzniemieja i bīdreibys “Līdere” vaļdis lūcekle nu Leivuona, kura jau daudzus godus dzeivoj i struodoj Reigā.