Itei nedele Latgolys muzykys cīneituojim sūluos byut cīši korsta. Grupys “Metrs” i “DeLight” aicynoj iz albumu prezentacejis koncertim Reigā i Daugovpilī, bet Rībeņūs gaidoma latgalīšu grupu paruode, iz skotivis kuops “Piparmētra”, “Dabasu Durovys”, “Latgalīšu Reps” i cyti Latgolā labi zynomi muziki.

26. aprelī, catūrtdīņ, Reigā, restoranā “Moonshine” iz debeja albuma “Bez tevis gaisā” prezentacejis koncertu aicynoj grupa “DeLight”. Pyrma koncerta byus vareiba konkursā laimēt jaunū albumu. Īeja bez moksys jau nu 18.00 stuņdem, bet koncerta suokums 20.00.

Albumā “Bez tevis gaisā” puorsvorā īkļautys dzīsmis, kas saraksteitys grupys pyrmsuokumūs, nu, mejūtīs sastuovam, tuos tykušys pi jauna skaniejuma i aranžejis. Pamatā dzīsmis stuosta par jaunīšu dzeivi i attīceibom. Itūšaļt grupys sastuovā ir Juoņs Raubiško (vokals, basgitara), Armands Zagorskis (gitara), Valdis Metlāns (bungys) i Juoņs Krēsliņš (vokals, tausteni).

27. aprelī, pīktdīņ, vysi rokmuzykys cīneituoji teik gaideiti iz grupys “Metrs” jaunuo albuma “Ēnas” prezentacejis koncertu klubā “Artilērijas pagrabi” Daugovpilī. Ar itū koncertu grupa īsuoks albuma prezentacejis pasuokumu cyklu vairuokuos Latvejis piļsātuos. Suokums 21.00 stuņdēs.

Vēļ pyrma albuma prezentacejis grupa “Metrs” pīduovoj sajimt pavasareigu roka vitaminu devu, nūsaklausūt dzīsmi “Likmes” nu jaunuo albuma.

Latgaliskos muzykys cīneituojim eisti svātki byus 28. aprelī, sastdīņ, kod iz Rībeņu Kulturys centra skotivis kuops virkne grupu. 19.00 stuņdēs jaunīšu koncertā uzastuos grupys “Piparmētra” i “Trešīs Ņūtona lykums”, kapela “Augusts”, muzike Rūta Pastare i Rībeņu jaunīši, kai ari grupa “Žvūrgzdyni”. Koncertā īeja bez moksys. 22.00 stuņdēs suoksīs koncertbals ar grupom “Unknown artist”, “Dabasu Durovys”, bruolim Punculim i grupu “Serenāde”, iz skotivis kuops ari hip hopa apvīneiba “Latgalīšu Reps”. Storplaikūs ballētīs grybātuojus izklaidēs DJ Rūdis. Bala īeja 5 eiro.