Gruomota “Latvijas pēdējie mohikāņi: Latgale” ir turpynojums 2016.godā izdūtajai gruomotai “Latvijas pierobežas pēdējie mohikāņi”, kurā atkluoti Latvejis pīrūbeža jūslā dzeivojūšūs cylvākus dzeivisstuosti.

Projekta suokumi meklejami 2015.godā, kod antropologe i fotografe Elīna Kursīte izlūluoja ideju apbrauktuot tūs Latvejis mozcīmus, kurūs palics mozuok kai 10 īdzeivuotuoju. Piec goda tyka izdūta Elīnys Kursītis un Elīnys Kolātis fotografeju i ceļuojuma pīzeimu stuostu gruomota “Latvijas pierobežas pēdējie mohikāņi”.

Piec sabīdreibys leluos interesis i pīprasejuma turpynuot itū sereju, kai ari projekta ideju realizātuoju atkluosmis, ka mozūs cīmu skaits ir cīši lels, 2017.godā projekts turpynuojās. Ītūreiz tyka apceļuota Latgola, kurā viesturiski itaidi cīmi vysvaira veiduojušīs i leidz myusu dīnom sasaglobuojuši.

2017.goda ekspedicejuos fotografe i antropologe Elīna Kursīte kūpā ar pietneicu Rūtu Šmiti apmeklēja vaira kai 50 Latgolys mozūs cīmus, intervejūt i fotografejūt īdzeivuotuojus. Ekspediceju rezultatā ir topušys fotografejis, kuruos kotra cīma īdzeivuotuojs ir radzams ar Latvejis karti, iz kurys nūruodeits konkretuo cīma nūsaukums. Īgiutuo informaceja nu intervejom ir puorvārsta miniaturūs stuostūs, izceļūt kotra satyktuo cylvāka individualū stuostu par kasdīnys porodumim, dzeivi, pasauļa prīkšstotim, dzeivis uzskotim i tt. Daļā nu stuostim atkluota ari cīmu i tū nūsaukumu rosšonuos. Daļu stuostu var īpazeit lopā facebook.com/latvijasmohikani.

Teik planavuots, ka gruomota “Latvijas pēdējie mohikāņi: Latgale” izīs 2018.goda golā i byus spylgta līceiba par Latgolys i, eipaši, Latvejis 21. godu symta suokuma īdzeivuotuojim. Gruomotā tiks publicāti 50 cīmu stuosti bilingvali – latviski i angliski, lai itys materials byutu daīmams plošam skaiteituoju lūkam, ari uorpus Latvejis. Itūšaļt teik vuoks gruomotys izdūšonai napīcīšamais finansiejums, sevkurs var atbaļsteit ar sovu zīduojumu vītnē projektubanka.lv.