Nu 31. juļa leidz 4. augustam Rēzeknis nūvoda Rogovkā nūtiks kursi školuotuojim “Vosoruošona-2018”. Školuotuojus aicynoj īpazeit Latgolu, padzeivuot latgalīšu volūdys daudzveideibā, i, reizē, atsapyust piec garuo dorba cielīņa.

Kursu organizatori, Latgalīšu volūdys, literaturys i kulturviesturis školuotuoju asociaceja, aicynoj pīsadaleit školuotuojus, kas grib vuiceit voi jau vuica nūvodvuiceibu, taipat voda latgalīšu volūdys stuņdis voi reikoj cytus latgaliskus pasuokumus školā i pogostā, nūstyprynuot latgalīšu rokstu volūdys prasmis, īpazeit dažaidus vuiceibu leidzekļus, taipat pajiemīņus, kai struoduot ar taidim, metodiku, daleitīs pīredzē, satikt dūmubīdrus i vyspuor jaukus cylvākus, pasasmeļt spāka i ideju jaunam dorba cielīņam.

Kursu golvonuo tema ir kompetenču pīeja nūvodvuiceibā. Dalinīki vuiceisīs latgalīšu rokstu volūdu, īpazeis jaunūs vuiceibu materialus, kab saprast, kai ar tim lobuok struoduot (“Olūteņš” i c.), kai atteisteit caurveju prasmis. Nūdarbeibuos īpazeis dažaidys metodis dorbam, kūpā struoduos rodūšajuos darbneicuos, tiksīs ar pazeistamim cylvākim – kulturys darbinīkim. Kai ari kursu apmaklātuojim byus īspieja dazynuot, kai veseleigi dzeivuot, kai dūmuot lobu, kai turēt sovu vītejū latvyskumu. Kursu beiguos vosoruotuoji sajims 36 stuņžu aplīceibu.

Kursim juopīsasoka aizpyldūt pīteikuma anketu i syutūt tū iz e-postu lvlksa@inbox.lv. Pīteikumus gaida leidz 23. juļam. Daleibys moksa ir 20 euro, leidzekļus izmontuos ādynuošonai. Latgalīšu volūdys, literaturys i kulturviesturis školuotuoju asociacejis bīdrim daleiba bez moksys. Piec pīteikuma sajimšonys organizatori sūla atsyuteit seikuoku informaceju.

Moksuot ar puorskaitejumu.
Rekviziti:
LVLKS asociācijas nodibinājums
Rģ. Nr. 50008056771
Swedbanka, konts Nr.LV53HABA0551025080062