Itūgod jau septeitū reizi Daugovpiļs nūvoda Leiksnā 14.–15. julī nūtiks latgalīšu muzykys festivals “Muzykys Skrytuļs”. Festivals pulcynuos muziķus, kuri dažaidūs žanrūs izpylda dzīsmis latgaliski. Organizatori aicynoj pīsateikt amatnīkus, zemnīkus i pīmuojis saimnīceibys, muojražuotuojus, radūšūs darbneicu dalinikūs i ādynuošonys uznāmumus, kuri grib tierguotīs festivala nūrisis laikā.

Tierguošonuos pīteikumi juoīsnādz leidz 22. juņam. Vaira informacejis i dokumenti pīejami sātyslopā skrytuls.liksna.lv.

Kai jai ziņuots, festivals “Muzykys skrytuļs” sastdiņ 14.00 stuņdēs suoksīs ar akustiskū koncertu muokslineicu apvīneibys “V.I.V.A.” dorbu izstuodē. Jaunuos latgalīšu grupys varēs dzierdēt dīnys koncertā, jau nu 15.15 stuņdem, kurā uzastuos: Ceidari, Ivars Štubis (Australeja), Dainis Adijāns, Brigita i grupa “AKVARELIS”, STAGE ON, Poetry Hunters (Lītova), Nagaidama Prīca, Eguceic, VPDK “Daugaveņa”.

Festivala laikā ar atsevišķu koncertu 18 .00 stuņdēs nūtiks postfolklorys grupys “Rikši” jaunuo CD albuma prezentacejis koncerts. Sovukuort vysa vokora i nakts garumā nu 19.00 stuņdem uzastuos Jānis Aišpurs nu “The Sound Poets”, Kārlis Kazāks, grupys Latgalīšu reps, Bez PVN, Dabasu Durovys, Sovvaļnīks, Fenikss, Metrs, Ausmeņa Records, Symbolic, Trikmiņs, Trešīs Ņūtona Lykums, Gandreiž 10nīkā, Unknown Artist, Delight, Piparmētra un Žvūrzdyni.

Paraleli koncertim byus vareiba baudeit dažaidys aktivitatis vysai saimei – varēs apsavērt gleznuotuoju apvīneibys “V.I.V.A.” dorbu izstuodi i vāruot kai muokslinīki dorbojās plenerā “Muokslys Skrytuļs”. Dorbuosīs bārnu piļsieteņa, kas pīduovuos gon rodūšys, gon izklaidejūšys aktivitatis mozim i lelim bārnim; nūsarysynuos tierdzeņš, kurā varēs na viņ gordai paēst, bet ari nūpierkt kaidu amatnīku darynuojumu ci suvenirus ar festivala simboliku. Byus vareiba ļautīs viesturis pīskuorīņam i apsavērt šmukū Leiksnys muižys parku i Leiksnys Vyssvātuos Jezus Sirds Rūmys katuoļu bazneicu, kai ari vīnkuorši baudeit šmukū Leiksnys dobu, latgalīšu volūdu i vīsmīleibu Daugovpiļs nūvodā.

Svātdīņ festivala nūslāgumā 10.30 stuņdēs Leiksnys Vyssvātuos Jezus Sirds Rūmys katuoļu bazneicā nūtiks gareiguos muzykys koncerts, kurā eipašu viereibu pīvērss tradicionalajim gareigajim dzīduojumim i Latgolys komponistu dorbim. Koncertā pīsadaleis Juoņa Ivanova Rēzeknis Muzykys vydškolys audzieknis Kate Slišāne (klarnete) i Alise Sīmane (varganis), Daugovpiļs Universitatis Muzykys i muokslu fakultatis asociātuos profesoris Ilonys Bagales vokaluos klasis studeņtis Diāna Laizāne i Megija Krista Strautmane, Vabalis pogosta etnografiskais ansamblis “Vabalis”, Rēzeknis Jezus Sirds katedralis kūrs “Adoramus” i Leiksnys Vyssvātuos Jezus Sirds Rūmys katuoļu katuoļu draudzis kūrs “Deo Gratias”.

Latgalīšu festivala “Muzykys Skrytuļs” reikuošona tyka suokta 2005. godā ar mierki popularizēt latgaliskū identitati i sekmēt jaunu dzīšmu radeišonu latgaliski. Festivalā īeja apmaklātuojim ir bez moksys.