Latvejis Pylsūniskuo alianse sadarbeibā ar Britu padūmi (British Council) realizej projektu “Rīga-Latgale video dialogā”, kab veicynuotu izpratni i popularitati par latgalīšu kulturu, tradicejom i volūdu, informej Latvejis Pylsūniskuos aliansis direktore Kristīne Zonberga.

Projektā īsaisteiti Latgolys īdzeivuotuoji, kas izkūpj latgalīšu kulturu, tradicejis i volūdu. Attuolums ir radejs plaisu storp Latgolu i puorejū Latvejis teritoreju, kas veidoj maļdeigu prīkšsotu sabīdreibā, ka itys regions kūpā ar sovu kulturu izmierst. Popularizejūt latgalīšu kulturu i pošdarbnīku aktivitatis, ir vareiba lauzt itūs stereotipus i veicynuot atteisteibu taišni itymā regionā, nūruoda K. Zonberga.

Dialogā īsaisteitajom pusem tiks snāgta vareiba daleitīs pīredzē, kai ari izsaceit prīkšlykumus i īsacejumus turpmuokys sadarbeibys veicynuošonai.

Video dialogs atspūguļoj treis veiksmeigus pīmārus Latgolys i Reigys sadarbeibai. Projektā pīsadaleja “Obelisk Farm” saiminīks Andris Višņevskis, Viļānu Muzykys i muokslys školys direktore Inta Brence, Kanepis Kulturys centra programys vadeituoja Liene Jurgelāne, vīns nu bīdreibys “Latgolys Golds” vadeituojim Juoņs Mejers, “Kalnciema Kvartāls” projektu vadeituoja Darja Trizna, Rēzeknis teatris “Joriks” i tuo marketinga i sabīdriskūs attīceibu vadeituoja Iveta Graudiņa i Dirty Deal Teatro producente i teatra vadeituoja Anna Sīle.