1920. goda janvarī Viļakys apleicīnē azaru, pūru, mežu i pokolnu labirintūs dziļūs snīgūs -30 grādu solā nūtyka legendaruos Latgolys divizejis kaujis pret lelinīkim. 1919. – 1920. godā Latvejis armeja ceiņejuos vaļsts zīmeļaustrumu pusē, kur tyka atkluots karaveirim veļteits Viļakys Bruoļu kopu pīmineklis Jaškovys kopūs. Itymā vosorā nūtiks pīminekļa atjaunuošona, sevkurs ir aicynuots zīduot nūzeimeiguos pīminis vītys saglobuošonai, informej Viļakys nūvoda muzeja direktore Rita Gruševa.

Bruoļu kopu pīminekli granitā veiduojs tielnīks Kārlis Zemdega, tys atkluots 1935. goda 22. septembrī. Pīmineklis pastateits golvonūkuort par Viļakys i tuos apleicīnis īdzeivuotuoju zīduojumim. Jaškovā guļdeiti 45 krytušī – 31 latvīts i 14 igauni. Padūmju okupacejis godūs pīminekli nūpūsteja, reizē ar Latvejis atdzimšonu tū restaurēja i 1990. goda 11. novembrī īsvieteja, nu restraucejis dorbi ir juoturpynoj.

Atjaunuošonys dorbus planavoj veikt ituo goda vosorā i pīminekli nu jauna atkluot novembrī – Latvejis symtgadis laikā. Restraucejis procesā 99% betona daļu aizvītuos ar granita, atjaunuos uzrokstu i zeimiejumus, nūstyprynuos postamenta pamatni, kuopnis i brugi.

Viļakys nūvoda simbola atjaunuošona ir pīsaceita uzjāmuma “ZAAO” projektā “100 Darbi Latvijai”. Dorbu eistynoj sadarbeibā ar Viļakys nūvoda dūmi i SIA “Volvo Trucks Latvia”. Viļakys Bruoļu kopu pīminekļa atjaunuošonai zīduot aicynoj sevkuru. Projekta eistynuošonai vajag 12299,65 eiro.

Informaceja zīduošonai
bīdreiba “Virica”
Reg. Nr. 40008218746
Konta nr. LV58UNLA0050021729068
Banka: SEB banka
Kods: UNLALV2X
Adrese: Skolas īla 24, Viļakys nūvods, Žīguru pogosts, Žīguri, LV-4584
Vaira informacejis: Viļakys nūvoda muzeja direktore Rita Gruševa, tel. 28386859

Publicitatis karteite: T. Babāne.