Roksta autore: Elvīra Žvarte, Latvīšu folklorys kruotivis zynuotniskuo asisteņte

Ceturtdiena, 28. augusts.
Vakar beidzu lasīt Rokvela Kenta “Skarbo pirmatnību”. Visai interesants gabals. Pie tam visi tur raksta dienasgrāmatas. Pat vecais Olsons – klaidonis, mednieks un zelta meklētājs.
“Īstā dzīves gudrība ir paslēpta dziļajā skarbās pirmatnības kausā zem mierīgās virsmas.”
Šodien apmācies un slapjš. Nolāpīts, pirmdien jāiet skolā.
Rudenīgs laiks iestājies. Vēja brāzmas un lietus, svina pelēkas debesis.
Olūts: garamantas.lv

Tai sovā dīnysgruomotā 1986. godā roksta pīcpadsmitgadeigais muzikis Kaspars Tobis, kurs sovys pusaudža godūs raksteituos dīnysgruomotys niu ir uzticiejs LU Literaturys, folklorys i muokslys iņstituta Latvīšu folklorys kruotivei (LFK) iz digitalizacejis laiku. Juo dīnysgruomota sūpluok vairuokim cytim autobiografiskajim rakstejumim ir unikals sova laika līcynuojums par kasdīnys dzeivi i jauna, rodūša cylvāka pasauļa izjiutu 1980. godu beigu Latvejā.

Jau nu LFK dybynuošonys 1924. godā folklorys materials sistematiski kuortuots arhiva fondūs, cikom 2014. godā virtualuos durovys attaisejs digitalais arhivs garamantas.lv, kurā sevkurs iņteresents ir aicynuots īsavērt vairuok nakai symts godu laikā sakruotajā montuojumā. Tī sūpluok naskaitomu folklorys teicieju, vuocieju, pīraksteituoju i pietnīku veikumam atrūnami ari autobiografiski rakstejumi – atmiņu stuosti, dīnysgruomotys i dzeivisstuosti. 2018. goda suokumā aizsuokta jauna iniciativa, kurys mierkis ir pīgrīzt viereibu i popularizēt sovys dzeivis dokumeņtiešonu rokstu formā.

Sevkurs teik laipnai aicynuots īsyuteit sovys voi globuošonā asūšys dīnysgruomotys, atminis i dzeivisstuostus, kas varbyut itymā breidī nasalīk vierteigi, tūmār piec nailga laika byus unikali līcynuojumi gon poša raksteituoja dzymtai, gon sabīdreibai kūpumā. LFK Autobiografeju kruojuma veiduotuoji piec aizvadeitūs mienešu digitaliziejuši pyrmūs īsnīgtūs materialus, kuru autori voi deponātuoji, slādzūt vīnuošonūs ar kruojuma veiduotuojim, nūsacejuši, cik plašai sabīdreibys daļai materials byus pīejams. Kūpā veiduot autobiografeju kruojumu aicynoj na tikai iņdividualus īsnīdziejus, bet ari namaterialuos kulturys montuojuma iņstitucejis.

Īpazeisti autobiografeju dažaidū dobu ite: https://ej.uz/kolekcijas
Seikuoku informaceju i kontaktus vaicoj ite: https://ej.uz/autobiografijas