Roksta autors: portals lakuga.lv

Latgolys viesturē sovus pādus atstuojušs dažaidys tautys, sovulaik ite dzeivuoja ari igauni. Laika gaitā jī saplyuda ar vītejim, veidojūt eipašu volūdu i kulturys montuojumu. Par Ludzys igaunim aba lucim sauc Vitebskys gubernis, Ludzys apriņčī sovulaik dzeivojūšū katuoļticeigūs Latvejis igauņu etniskū grupu. Leluokuo daļa lucu dzeivuoja tagadejūs Pyldys, Nierzys i Ņukšu pogostu teritorejā. Līceibys par igaunim myusu dīnuos sasaglobuojušys vīneigi vītvuordūs i itymūs pogostūs pīraksteitajā folklorā. Vaira pa zudušū etniskū grupu varēs izzynuot pasuokumā “Ludzas igauņu vesture, kultūra un valoda” 13. augustā.

Pietnīkim da gola nav izadevs nūskaidruot, kod Latvejis teritorejā igauni apsamete. Teik mynāts gon 17., gon 18. godu symts. Pastuov treis versejis par igauņu nūkliušonu Latgolā:
1) karaļs Kārlis Igaunejā īguoje ar luterticeibu, par tū īgauni – katuoli puorsacēle iz Latvejis daļu, kur voldūšuo beja katuoļticeiba;
2) muižkungi vasalus dzymtļaužu cīmus ir puorspieliejušs kartuos ci īmainiejušs pret kaidu montu;
3) Latgolā tryuka katuoļu goreidznīku, par tū nu Dīnvydigaunejis aicynova dominikaņu mūkus, kas izveidova centru Pasīnē i dorbuojēs plošā apleicīnē, jim leidza puorsacēle saimis nu Igaunejis, jo Latgolā beja daudz breivys zemis.

Vēļ 20. godu symtā Ludzys rajonā beja cylvāki, kuri zynuoja sovu seņču volūdu, tūmār leluokuo daļa īceļuotuoju piecteču godsymtu laikā beja asimiliejušīs. Interesants ir fakts, ka volūda, kaidā runova Ludzys igauni, nabeja sastūpama Igaunejā.

13. augustā 17.00 stuņdēs Ludzys piļsātys golvonajā bibliotekā pasuokumā “Ludzas igauņu vesture, kultūra un valoda” ar prīkšlasejumim pīsadaleis ari vairuoki uorzemu pietnīki.

Karl Pajusalu nu Tartu universitatis saceis īvodvuordus, Petri Kallio nu Helsinku universitatis skaiteis prīkšlasejumu par dīnvydigauņu volūdys solom Baļtejis jiurys sūmu volūdu ainovā, Valter Lang nu Tartu universitatis stuosteis par Baļtejis jiurys sūmu atkluošonu, Uldis Balodis nu Rītumu apdraudātūs volūdu dokumentacejis instituta stuosteis par Ludzys igaunim i jūs piectečim.

Ludzys igauņu volūdys skaniejumu atdzeivynoj folklorys kūpa “Ilža”, kas planavoj izdūd disku ar Ludzys igauņu dzīsmem. Tuos skanēs ari pasuokumā.