Roksta autore: Vineta Vilcāne, portals lakuga.lv

Jau vairuokus godus školuotuoji nu Latgolys i ari cytu nūvodu školu, kai ari latgalīšu kulturys entuziasti, sasateik “Vosoruošonā”. Kursūs Rēzeknis nūvoda Rogovkā nu 30. juļa leidz 3. augusta dalinīki doluos sovā pīredzē latgaliskuo īdzeivynuošonā vuiceibu procesā, giust jaunys atzinis i nūdereigu informaceju nūdarbeibuos, kai ari smeļās īdvasmu i spāku jaunajam vuiceibu godam. Itūgod kursu golvonuo tema ir kompetenču pīeja nūvodvuiceibā.

“Vosoruošona” itūgod puļciejuse ap 23 dalinīku, tūs vydā ir gon Latgolys, gon Reigys školu pedagogi, ari latgaliskuos kulturys interesenti. “Šūgod pīsadola ļūti daudz jaunu vosoruotuoju, ir školuotuoji, kas brauc vairuokus godus. Ostoni dalinīki itymūs kursūs ir pyrmū reizi, pīsadola ari treis školuotuojis nu Reigys, kas ir gotovys sovim audzieknim stuosteit par Latgolu i ari pieteit Reigys apleicīni, kurymā atsarūn jūs školys,” stuosta kursu organizatore, Nautrānu vydsškolys školuotuoja Veronika Dundure.

Reigys Hanzys vydškolys angļu volūdys školuotuoju Jelenu Jakovlevu atbraukt iz “Vosoruošonu” pamudynuojušs kolegys lobuos atsauksmis par kursim i ari vēlme vaira īpazeit Latgolu. Kai atzeist Jeļena, pyrmajā dīnā bejs gryuši saprast latgaliski saceitū, bet nuokušajā jau bejs vīgluok i izadevs pat īsadzilinuot latgalīšu rokstu volūdys gramatikā. Sarunā Jeļena Jakovļeva uzsver: “Es uzskotu, ka latgalīšu volūda ir pylntīseiga volūda, i par tū ir juosaceina. Školā latgalīšu volūdu byutu juovuica kai atsevišku prīkšmatu.” Školuotuoja atzeist, ka ar Reigys kolegom eisti nasaīt runuot par latgalīšu volūdys vaicuojumim: “Tei ari ir problema, ka par itim vaicuojumim narunoj, voi nu nūsarūbežoj, voi nagryb par ti īgrimt diskusejuos, voi ir vīnolga.”

Šūgod kursu programa ir interesantuoka i pīsuotynuotuoka kai cytus godus, soka poši vosoruotuoji. Kursu programā lels uzvors lykts iz kompeteņču pīeju, ari iz nūvodvuiceibu, kai tū vuiceit i kai izmontuot asūšūs vuiceibu leidzekļus. Tics runuots par latgalīšu rokstu volūdys vaicuojumim i tuos vuiceišonu, īpazeiti asūšī vuiceibu leidzekli i latgalīšu literatura, runuots ari par folklorys materialu izmontuošonu vuiceibu procesā i vuiceibu metodiku. “Vosoruošona” dūd īspieju školuotuojim daleitīs sovā pīredzē, satikt latgalistikys pietnīkus, diskutēt par aktualim vaicuojumim, vīnlaikus ari atsapyust i smeļtīs energeju jaunajam vuiceibu godam.

Iz vaicuojumu, kas motivej organizēt “Vosoruošonu”, Veronika Dundure atsoka: “Tei laikam ir muna dzeive, daudzi kolegys soka, met tu molā tū vysu, vīnu vosoru atsapyut! Bet tys ir interesanti, tei ir īspieja sasatikt ar lobim cylvākim. Vosoruotuoji poši soka, ka pīsasmeļ spāku vysam nuokušajam vuiceibu godam”. Organizatori cer, ka nuokūtnē izadūs pīsaisteit ari vaira jaunuokuos paaudzis školuotuoju, kas varātu turpynuot ari kursu organiziešonu. Taipoš byutu napīcīšamys ari nūmetnis i seminari bārnim i jaunīšim, kurymūs apgiut latgalīšu volūdu i vaira izzynuot sova nūvoda viesturi i kulturu.

Karteite: portals lakuga.lv