Roksta autors: portals lakuga.lv

Latgolys Homers, Latgolys Prometejs, tautys dvēselis tulks – tai sauc dzīsminīku i gruomotu puorraksteituoju Andryvu Jūrdžu. Jis dzims 1845. godā Ludzys apriņča Nautrānu pogosta Kuorklinīkūs. Par speiti tam, ka Andryvs dzims dzymtcylvāku saimē, jis patstuoveigi ar muotis paleidzeibu īsavuiceja skaiteit i raksteit, kai ari prats runuot krīviski, pūliski i lītuviski, beja īsavuicejs ari latiņu volūdu.

A. Jūrdžs nu gruomotu i puornūvodu latvīšu gazetu i žurnalu iz atsevišķu lopu tulkuoja iz latgalīšu volūdu i puorraksteja tū, kas jam ruodejuos saistūšuoks i vierteiguoks. Tai jam roduos atzinis i vierteigys dūmys par dzeivi. Nu puorraksteitūs lopu jis sataiseja bīzys gruomotys, īsieja tuos i puordeve par samoksu ci duovynuoja Latgolys ļaudim. Andryva Jūrdža rūkroksti ir cīši vierteigi tuo laika ļaužu psihologejis, redzīņu i gora dzeivis atspīgeļuotuoji. Zynomuokuo nu Jūrdža sastateitūs gruomotu ir Myužeigais kalinders”. Tys sastateits rūkrokstā i īsīts cītajūs vuokūs. Orginals atsarūn Latvejis Nacionalajā bibliotekā. Kalendarā apkūpuotys atzinis i padūmi gareigajai i saimnīciskajai dzeivei. Juopībylst, ka ar taidu pošu nūsaukumu – „Myužeigais kalinders” – ir uzjimta kina par divejom spieceigom dzymtom nu Andryva Jūrdža pusis – Ivulānim i Jūrdžim. Ari kinā teik atkluotys palīkūšys vierteibys ļaužu kasdīnā i sadzeivē. Pīduovojam 10 atzinis nu Andryva Jūrdža “Myužeiguo kalindera”.