Roksta autors: portals lakuga.lv

Stiernīnē nu 31.augusta leidz 2.septembram nūtiks gūdynomuo veiskupa Boleslava Sloskāna 125. jubileja svineibys. Tymuos ar koncertu pīsadaleis Vaļsts Akademiskais kors “Latvija”, byus diskuseja par vierteibom i svātumu myusu dīnuos, eipaša programa jaunīšim. Itūšaļt Vatikanā nūteik B. Sloskāna beatifikacejis process, veiksmeiga iznuokuma rezultatā B. Sloskāns byus pyrmais oficiali atzeitais latvīšu tauteibys svātais.

Boļeslavs Sloskāns dzims 1893. goda 31. augustā Latgolā, Stiernīnis draudzē, nu augstuokū izgleiteibu dabuojs Pīterburgā. 1926. godā slapani nu padūmu varys pāvests īsvietieja jū par katuoļu veiskupu. B. Sloskāns beja vīns nu treju katuoļu veiskupu, kas tymā laikā dorbuojās PSRS. Dreiži piec īsvieteišonys padūmu vara jū apcītynuoja i vuordzynuoja cītumūs da 1933. godam, kod atbiļdūt iz Vatikana i Latvejis vaļdeibys praseibom, PSRS vaļdeiba veiskupu īmainieja Latvejai pret padūmu spīgu. Latvejā veiskups struoduoja Gareigajā seminarā i Latvejis Universitatis Teologejis fakultatē. Nu 1944. godā vuocu okupacejis vara B. Sloskānu i vēļ cytus augstus bazneicys kolpuotuojus nūvede trymdā iz Vuoceju. Tī veiskups Sloskāns snīdze lelu atbolstu studiejūšim latvīšu biegļu jaunīšim. Veiskups nūmyra 1981. godā Beļgejā. 1993. godā juo mirsteiguos atlīkys tyka puorvastys iz Latveju i puorapbedeitys Aglyunys bazilikys kriptā. 2000. godā tyka izsuokts Sloskāna beatifikacejis process, tys itūšaļt nūteik Vatikanā i veiksmeiga iznuokuma rezultatā B. Sloskāns byus pyrmais oficiali atzeitais latvīšu tauteibys svātais.

Pīktdiņ, 31.augustā, 19.00 stuņdēs Stiernīnis bazneicā Vaļsts Akademiskuo kora “Latvija” goreiguos muzykys koncerts “Mirdzi, Stirniene, Latvijas zvaigznājā!”.

Sastdiņ, 1.septembrī, 10.00 stuņdēs Stiernīnis tautys nomā diskuseja “Vai viegli būt Sloskānam 21. gadsimtā”, saruna par tū, kuodieļ vysuos jūmuos svareigi runout par vierteibom i svātumu myusu dīnuos, cik gryuši ci vīgli realizēt svātumu 21. godu symta kasdīnā. Sarunā pīsadaleis Andrejs Mūrnieks (LU profesors), Ieva Broka (advokate), Janīna Kursīte (LU profesore), Andris Priede (prīsters), Skaidrīte Lasmane (emerit. profesore), Māris Justs (Varakļuonu nūvoda pošvaļdeibys prīkšsādātuojs). Sarunu vadeis Andris Kravalis (prīsters), Anita Saleniece (Varakļuonu vydškolys direktoris vītneica).

1.septembrī nūtiks ari jaunīšu pasuokums, 15.00 stuņdēs Stiernīnis bazneicā byus slaviešona, tū vadeis Vydzemis katuoļu jaunīšu centrs, 15.30 stuņdēs Draudzis duorzā byus stuostejums par veiskupu B. Sloskānu, 16.30 interaktivs īdvasmys seminars, 17.30 stuņdēs sadraudzeibys pikniks kūpā ar Latvejis i vītejim muzikim. Dīnys nūslāgumā 20.00 stuņdēs svineigī nešpori i adoraceja, Stiernīnis goreiguos muzykys kora “Reversium” i solistu koncerts.

Svātdiņ, 2.septembrī, 11.30 Kr. Dāvida pamatškolys bazūņu kora uzastuošona, 12.00 stuņdēs svineigais Svātais Mišs gūdynojamuo veiskupa Boleslava Sloskāna 125. jubilejā.