Dzejis autore: Meldra Gailāne

MELDRA GAILĀNE ir jaunuos paaudzis latgalīšu ailineica. Vosorys suokumā izguoja juos gruomota bārnim “Meikuleņš īpazeist omotus”, kurymā atrūnamys puorsokys par luocānu. Puorsokys Meldra ir rakstejuse 15 godus puormejus ar dzeju. Meldra atzeist, ka asūt vysu laiku nazkū rakstejuse: dīnysgruomotys, dzejūļus, stuostus, puorsokys i pat lugys. “Es vysu laiku grybu izdūt sovu dzejūļu gruomotu – par dzejūlim es “dagu” vaira. Puorsokys ir pa vydu dzejis tekstim, tod, kod kaids paprosa koč kū saraksteit deļ bārnu,” intervejā portalam lakuga.lv sacejuse Meldra Gailāne. Pylnu sarunu var skaiteit rokstā “”Raksteišona deļ mane ir kai elpuot,” saruna ar literati i pīcu bārnu mamu Meldru Gailāni”.

atpestej mani nu
manis pošys
muns olkonums
piec tevis
sadadzynuos dabasus
īt snīgs
i apsadz muna
napruota pādus

&&&

munys īdūmys par tevi
beja atslāgušys vysus
sapruota apsvārumus
taids piļceits tāls
munā prīškā
nu nūceju i seikys pīsačeršonys

&&&
pylnatnīs kuražejūs iz mienesi
varažneicys ašnis munuos dzeisluos
naļaun mīreigai īmigt
grybīs pajimt slūtu i skrīt dabasūs
a eimu mauduotūs
iudiņs kai šolks
atlaid maņ munus poruodus

&&&
izraksteišu tevi nu sovys sirds sātys gruomotys
damiersšu tovu lyupu garšu
vaira nikaidu klikšķu dasadyurīņūs
i nikaida tova smuorda spylvynūs
gaismu nūdzieš pādejais
i kū tod?

&&&
skaitu tevi kai atvārtā gruomotā
sevkurš liters dadzynoj
ocu i sirdi
ka prasšu aizskaiteit aiz literu
mož atsagrīzsi?
nūceja namierst

&&&

jei beja loba sīva
veirs apmeiļuots
treis iedīni goldā jau nu agra reita
vyss pošu – nu grādys ci pogroba
i teirs krakls sagataveits
kopejs konnā iz plitys
bārni apklusynuoti
duorzs izreveits
žeivoti pabaruoti
ustoba izslauceita
veirs smaida i soka ka mīļoj
a jei…
a jei pylnatīs vylkatīs skrīn
i lyudz kab sātā naatsagrīst

&&&

gryuta tova nosta, muos
smiļktī kuojis grims kumeļam
natiks jis upis ūtrā krostā
viņ palādys bolsā klīgs
tī bārni nadzymušī
pusnakšūs puori Stiksai irūtīs

&&&

i beja saceits –
tev tiks dūts
pyrma praseisi
atlaidu svātdīne bazneicā
deļ nakryškuonu
ejūt nūstuošonys
var tikt pi suopeigu atskuortu
par napareizū krysta ceļu
par greizū audzynuošonu
bārnim ir juobyut mīreigim

&&&

šudiņ nūmešu zuomauci
ci pamaneisi?
samīļoj mani
ari tod kod nadreikst
dasadūrt
īleidu olā
atsaveseļuot
reitu byus jauna dīna

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzeklim.