Rokstu sagataveja: portals lakuga.lv

25 godus piec Juoņa Puovula II vizeitis Latgolu otkon apmeklēs pāvests, 24. septembrī Juo Svieteiba pāvests Francisks celebrēs Svātū Mišu Aglyunys bazilikā. Organizatori publiciešjušs svareigu informaceja pasuokuma apmaklātuojim.

Nu 9.00 da 14.00 īīšona Aglyunys bazilikys sakralajā laukumā – cauri 1., 2., 4. voi 6. vuortim. Cylvākim ar kusteibu trauciejumim paradzāti 3. vuorti. Pyrma īīšonys byus juoizīt drūšeibys kontrole, tod varēs dūtīs iz sektoru, kuru nūruodeis breivpruoteigī.

Aglyunys bazilikys laukumā drūšeibys apsvārumu deļ byus aizlīgts īnest itaidus prīškmatus:
– leitasorgus,
– stykla taru (butelis, burkys, traukus i c.),
– lelgabarita lītys voi sūmys (ītylpeibai juobyun na leluokai par 5 litrim),
– karūgus voi plakatus,
– alkoholu, narkotiskuos i psihotropuos vīlys,
– strumpis, sviļpis, bubynus i cytys skanis pastyprynūšys īreicis,
– radejis raideituojus i uztvieriejus,
– portativūs pošbiļžu rūkys stativus (selfejstikus),
– vysa veida īrūčus i pošaizsardzeibys īreicis,
– lidojūšus prīškmatus (radejis vodomi, bezpilota objekti i c.),
– sevkura veida pirotehnikys izstruoduojumus (dyumu svecis, petardis i c.),
– sporta inventaru,
– guņsnadrūsys, spruodzīņbeistamys, kimiskys i biologiskys vīlys,
– lazerīkuortys,
– sevkuru cytu prīškmatu, kas var radeit apdraudiejumu voi trauciejumu cytim apmaklātuojim voi pasuokumam.

Organizatori lyudz pasuokuma laikā mobilūs telefonus uzstuodeit klusuma režimā voi izslēgt.

Īejis kartis

Nu 9. da 23. septembra bazneicuos var izjimt īejas karti iz pāvesta svynātū Svātū Mišu Aglyunā.

Ka kaids grib dūtīs iz Svātū Mišu Aglyunā, bet nav registriejīs, tod da 23. septembra var dūtīs iz sovu draudzi i interesētīs par breivom īejis kartem. Sevkurai draudzei ir pīškierts nalels itūs īejis karšu skaits. Iz Aglyunu var dūtīs ari bez īejis kartis, vīneigi itim cylvākim, varams, nabyus nūdrūsynuota Svātuos Misis gruomateņa.

Dreikst i īsokams jimt leidza:
– leita mieteli,
– iudini, piļdeitu plastmasys butelēs,
– svīstmaizis,
– nalelu salīkamū kriesleņu,
– rūžukrūni,
– vajadzeigūs medikamentus.

Sakralajā laukumā byus izlyktys bezmoksys lobīreiceibys (atejis), dorbuosīs mediciniskuos paleidzeibys punkti, spoveds krāsli (grāksyudzis īspieja nu 9.00 da 14.30).
Organizatori lyudz bez vajadzeibys naatstuot sovu sektoru i bazilikys sakralū laukumu.
Naskaidreibu gadīnī varēs grīztīs informacejis centrā (uorpus sakraluo laukuma) voi pi breivpruoteigajim (sakraluo laukuma teritorejā).

PROGRAMA sakralajā laukumā

8.20 – 12.20 – tīšraide par pāvesta sagaideišonu i vizeiti Reigā.
12.20 – 13.00 – dīniškys (individuali, ar leidza pajimtajom svīstmaizem).
13.00 – dokumentaluo kina par Aglyunys Dīva Muoti.
13.15 – Aglyunys Dīva Muotis svineiga iznesšona, proceseja ar Dīva Muotis stetgleznu pa laukumu.
13.45 – Dīva Muotis litaneja.
14.00 – Rūžukrūņs.
9.00 – 14.30 – īspieja grāksyudzei.
15.30 – dokumentala kina par pāvestu Francisku.
16.00 – pāvesta sagaideišona.
16.30 – Svātais Mišs.

Ar sabīdryskū transportu iz Aglyunu

AS “Pasažieru vilciens” 24. septembrī nūdrūsynuos papyldu viļcīņus, ar kurim varēs ārtai tikt nu Reigys iz pāvesta Franciska Svātū Mišu Aglyunā i atpakaļ. Iz Aglyunu itamā dīnā tiks nūreikuoti treis eipaši viļcīni, kuri kursēs dīnys pyrmajā pusē, kab vysi interesenti laikā tyktu nūtykuma vītā pyrma Svātuo Miša suoku. Apmaklātuoju ierteibom tikšonai golamierkī viļcīņu kursiešonys grafikam tiks pīlāguoti autobusu reisi nu i iz Aglyunys dzeļžaceļa staceju. Vysi, kuri grib 24. septembrī tikt Aglyunā ar viļcīni, aicynuoti sekuot leidza AS “Pasažieru vilciens” aktualajai informacejai interneta vītnē www.pv.lv, socialūs medeju kontūs – “Facebook” @PasazieruVilciens i “Twitter” @PVilciens, kai ari ziņom plašsazinis leidzekļūs.

Autostuovvītys Aglyunā
Nu 22. da 25. septembra Aglyunys teritorejā byus īreikuotys autostuovvītys svātceļnīku vīglajom automašynom i autobusim. Kūpumā paradzātys 18 transporta nūlikšonys vītys, no kurūs leluokuo daļa ir pavysam tyvu Aglyunys bazilikai. Juos byus izvītuotys pi autoceļu, pa kurim no vysaidu pušu var ībraukt Aglyunā. Cylvākim ar invaliditati planavuotuo autostuovvīta ir vystyvuok Aglyunys bazilikai – Kruoslovys īlā.

Svareigi pīgrīzt viereibu, ka daudzkur iz ceļu byus aizlīgts apsastuot i stuovēt. Pyrmkuort, tys atsateic iz celim Aglyunys bazilikys tyvumā. Taipat byus aizlīgts apsastuot iz ceļa nu Aglyunys dzeļžaceļa stacejis vierzīnī iz Aglyunu, kai ari iz Jaunaglyunys ceļa.
Sovutīs kravys mašynu vadeituojim juojam varā, ka byus tranzita satiksmis īrūbežuojumi, partū itamuos dīnuos īsokoms izmontuot apbraucamūs ceļus.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.