Rokstu sagataveja: portals lakuga.lv

21. septembrī 15.00 Daugovpiļs Marka Rotko muokslys centrā tiks prezentāts muokslineicys Silvys Linartis dzeivisstuosta izdavums i atkluota muokslineicai veļteita pīminis ekspoziceja “Dvēseles ainas”.

Gūdynojūt izcyluos muokslineicys i ilggadejuos muokslys pedagogis Silvys Linartis (1939–2018) pīmiņu, 21. septembrī 15.00, piec presis konfereņcis, nūtiks izdavuma “Latgalē dzimušu mākslinieku dzīvesstāsti. Silva Linarte” prezentaceja i 16.00 jaunuos izstuožu sezonys ītvarūs, tiks atkluota eipaša, muokslineicai veļteita ekspoziceja, kas byus apsaverama Marka Rotko ekspozicejis meditativajā “Klusuma telpā”.

Silvys Linartis dzeivisstuosts ir ūtruo publikaceja serejā “Latgalē dzimušu mākslinieku dzīvesstāsti”, kū veidoj Daugovpiļs Marka Rotko muokslys centrys sadarbeibā ar bīdreibu “DIVRUNA”. Publicātais dzeivisstuosts ir tekstuali apjūmeigs i saturiski boguots muokslineicys stuostejums par dzeivi i radūšū darbeibu gondreiž ostoņdesmit godu garumā, kū papyldynoj pietnīcyskuo dorba gaitā sagataveitī redaktoris Zanis Melānis komentari, kai ari fotografejis nu personeigūs arhivu i Rotko centra kolekcejā asūšūs muokslys dorbu reprodukcejis.

Izdavums taps ar Latgolys regiona atteisteibys agenturys, Vaļsts kulturkapitala fonda i A/S “Latvijas valsts meži” finansialu atbolstu.

Silvys Linartis dzeivisstuosta izdavums interesentim byus daīmams Daugovpiļs Marka Rotko muokslys centrā, sovutīs ekspoziceja byus apsaverama da ituo goda 4. novembra.

Karteite: publicitatis materials

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.