Roksta autors: portals lakuga.lv

Citejūt seneju latiņu teicīnu, atkuortuošona vēļ arviņ ir zynuošonu muote, deļ tuo Latgalīšu kulturys ziņu portalā lakuga.lv pīduovojam atkuortuot nedelis dīnu raksteibu latgalīšu rokstu volūdā.

Nedelis dīnys latgaliski roksta: pyrmūdīne, ūtardīne (sarunvolūdā i izlūksnēs soka ari “ūtarnīks”), trešdīne, catūrtdīne (ari vacvuordā “catūrgs”), pīktdīne, sastdīne i svātdīne. Izlūksnēs dzierdami nedelis dīnu nūsaukumi ari ar eisū “i” – pyrmūdine, ūtardine, trešdīne i tai tuoļuok, taipat ar golūtni “-a” – pīktdīna, sastdīna i cytys, bet raksteibā īsokamuo forma ir ar garū “ī” i golūtni “e”.

Ka vajag atsaceit iz vaicuojumu “kod?”, tod roksta: pyrmūdiņ, ūtardiņ, trešdiņ, catūrtdiņ, pīktdiņ, sastdiņ i svātdiņ. Pīmārs: Trešdiņ mes ar draugim nūbrauksim iz Ludzu. Ka gribīs pasceit, ka koč kas nūteik, par pīmāru, kaiduos nūsaceituos nedelis dīnuos, tod var raksteit ari “pyrmūdīnem”. Taipat ir ūtardīnem, trešdīnem, catūrtdīnem, pīktdīnem, sastdīnem i svātdīnem. Pīmārs: Pyrmūdīnem piec sešu maņ suocās basketbola treneni. Ūtardīnem nu reita mums vysod ir dorba sapuļce. Bet, ka vajadzēs raksteit “kotru sastdīni”, tod tū var dareit ari kai “kas sastdīnis”. Pīmārs: Kas sastdīnis zam vokora mes ar saimi sasateikam, kab ītu iz pierti. Leidzeigi ari “kas pyrmūdīnis”, “kas catūrtdīnis” i tai iz prīšku.

Aicynojam nūsavērt ari latgalīšu volūdys apvuiceibu video, kurymā par nedelis dīnom stuosta literats Valentins Lukaševičs:

Bet sovs nedelis parāds ir ari grupys “Tautumeitas” dzīduotuos dzīsmis “Sastdīne” varūnei.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzeklim.