Roksta autori: Inga Čekša-Ratniece, Māris Justs, žurnals “A12”

Sveņtis pogosts ir izavītuojs Daugovys kairajā krostā storp Daugovpili i Leitovys rūbežu. Tys ir eipašs ar tū, ka, byudams Latgolā, īškeji tys vaira jiut pīdareibu Sielejai i vēļ vaira – pūlim. Nu Sveņtis da Daugovpilei i Ilyukstei ir viņ drupeit vaira kai 10 km mārojams lobs asfalta ceļš. Sveņtei puori guoja i Pyrmuo, i Ūtruo pasauļa kara froņtis linejis, atstuojūt viesturis pādus – kritušūs karaveiru apbedejumus.

Brigita Vasilevska, pogosta puorvaļdis vadeituoja stuosta, ka jaunī cylvāki, koč ari piec tauteibys ir pūli, volūdys vaira nazyna. “Kai jau vysur, brauc paceli: ka na iz uorzemem, tod leluokom piļsātom. Mes varim byut kai guļamrajons, partū ka natuoli ir Daugovpiļs. Ceļš ir lobs, ari sabīdryskais transports nūdrūsynuots: autobusi i iz Daugovpili, i Ilyuksti brauc piec stuņdis, kursej ari maršrutā Jākubpiļs–Zasa–Daugovpiļs. Daudzi struodoj Daugovpilī 15 minušu braucīnī, bet dzeivoj itamā nūstyurī, kur ir doba, kur var vīgli elpuot. Pošā Sveņtē izdeveigi dzeivuot.”

Plašuokai sabīdreibai Sveņte atpazeistameibu īgiva ar pili, kuramā nūtyka seriala “Ugunsgrēks” fiļmiešona. Viesturis olūti viestej, ka kūšū Sveņtis muižu (sauktu ari par Jaunsveņtis muižu) kai saimis sātu 1912. godā izcēle grafs Mihails Plāters-Zībergs. Tai kai pats dzeivuoja Vuocejā, tū izmontuoja caurbraucūt. Piec muižys nacionalizacejis 1921. godā kungu sātā dorbu suoce latvīšu pamatškola, Ūtruo pasauļa kara beiguos te beja kara hospitaļs, piec kara otkon škola, tīsa gon, vuiceibu stuņdis nūtyka krīvu volūdā. 1975. godā Sveņtē izcēle jaunu školu 600 školānu apvuiceibai. Sovutīs muiža 30 godus beja pamasta i pūsteita. Ludmila Pavlovska, Sveņtis muižys vadeituoja, stuosta, ka padūmu laikā školā vuicejuos muižys nuokušais saiminīks. Asūte sacejs, ka nazkod itei āka byuškūte juo. Sapyni pīsapiļdeja – izpūsteituo muiža tyka renovāta. Ākys fasade i paradis trepis beja atjaunuotys jūs pyrmatnejā skaistumā, saglobuoti kruosu tūni. Muižā ir 7 ekskluzivi kamyni, atvasti nu nazcik vītu. Suonim muižai ir Amerikys trimdys latvīšu grupys “Čikāgas piecīši’’ dzīduotuoja i dzīšmu autora Ilmāra Dzeņa dzymtuo sāta. Muižā tyka filmāts ari serials “Ugunsgrēks’’. Sūpluok vīsneicai, bejušajā muižys saimisteibys sātā – kara tehnikys kolekceja. Jaunsveņtis parks, sūpluok muižai, lapnojās ar 60 kūku i kryumu sugom. Ari pyrma daudzu jū daudzu godu īvastī nu cytu vītu kai aizsorgojamais akmiņa bārzs, cīdrys, Eiropys lopegle, Mandžurejis rīkstkūks, Ungarejis cereņš.

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta līdzekļu projektā “Robežlīnijas”.