TV šova “X Faktors” dalinīku vydā ari “Baritoni” nu Latgolys

TV šova “X Faktors” dalinīku vydā ari “Baritoni” nu Latgolys

Rokstu sagataveja: portals lakuga.lv

Vakar nūsaslēdze TV3 šova “X Faktors” krāslu izaicynuojuma kuorta, piec kuruos šova divpadsmit dalinīku vydā, izturūt vairuokys atlasis kuortys, tyka ari grupa “Baritoni” nu Latgolys. Grupys dalinīki – Ingars Puncuļs, Artūrs Puncuļs, Mārtiņš Strods i Normunds Litovnieks, kurī sevi dasoka kai četrus skaneigus latgalīšu baritonus – da ituo pīsadalejuši gon muzykys šovūs, gon aktivi muziciejuši vysā Latvejā.

Vysi grupys dalinīki ir draugi, kas kūpā pīsadalejuši TV3 šovā “Koru kari” Normunda Zuša vadeituo Rēzeknis Zaļūs pakolnu kora sastuovā. Individuali i dažaidūs sastuovūs puišim ir lela ari cytu šovu pīredze – “Dziedošās ģimenes”, “Mūsu labākās dziesmas” i cytūs. Ingars i Artūrs aktivi muzicej kai apvīneiba “Brāļi Puncuļi”, bet Mārtiņš i Normunds grupā “Zaļā gaisma”. Mārtiņš Strods šova “X Faktors” atlasē pīsadaleja ari pārnejā godā, bet šova pamatdalinīku vydā natyka. 

Pyrmajā atlasis kuortā, kurū varieja viertīs TV ekranūs, “Baritoni” kai žureju, tai skateituojus aizkustynuoja ar grupys “Bez PVN” dzīsmi “Eņgeli sviļpoj”, bet itūreiz grupa tyka tuoļuok ar Riannys dzīduotuos dzīsmis “Umbrella” rokenrola verseju. Grupa sevi dasaceja tik spylgti, ka internetā jau gotovys pyrmuos “memis”. “Baritoni” šovā struoduos Intara Busuļa komandā. Kai jim “X Faktors” vessīs, TV ekranūs varēs viertīs svātdīnem 20.20 kanalā TV3. Šova uzvarātuojs tiks nūskaidruots 16. decembrī.

Grupys dalinīks Ingars Puncuļs intervejā lakuga.lv par pīsadaleišonu šovūs i byušonu aktualim saceja: “Aktualam byut ir cīši svareigi. Juorauga sevi motivēt, vajadzeiga atteisteiba iz prīšku. Tev ir juoskaņ radejā i juobyut televizejā. Deļtam mums niu ir izveiduots jauns projekts “Baritoni”, ar kuru startiejom šovā “X Faktors”.” Vysu interveju ar Ingaru Punculi var puorskaiteit ite: https://www.lakuga.lv/2018/06/01/man-pompozitatis-navajag-saruna-ar-muziki-ingaru-punculi/

Pyrmajā “X Faktors” sezonā uzvarieja Artūrs Gruzdiņš, bet leluokū popularitati piec šova dabuoja grupa “Tautumeitas”, kurūs repertuarā ir ari dzīsmis latgaliski i grupa vairuokys reizis sajiemuse Latgalīšu kulturys goda bolvu “Boņuks”.

Dzeivuot leidza grupys “Baritoni” aktualitatem var socialajūs teklūs Facebook i Instagram

 

Karteite – ekransuovīņs.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.

 

Kalenders

Mar
19
Tre
11:00 Nūvodpietnīceibys piecpušdīne pa... @ Kuorsovys piļsātys biblioteka
Nūvodpietnīceibys piecpušdīne pa... @ Kuorsovys piļsātys biblioteka
Mar 19 @ 11:00 – 12:30
Rakstnīka Jezupa Laganovska 105. jubilejam veļteita nūtikšona.
12:00 Izstuodis “Paātrinājums” atkluošona @ Jaunbyuvis biblioteka
Izstuodis “Paātrinājums” atkluošona @ Jaunbyuvis biblioteka
Mar 19 @ 12:00 – 13:00
Sagaidūt nūzeimeigu latvīšu gruomotnīceibys jubileju – pyrmuos īspīstuos gruomotys latvīšu volūdā pīcsymtgadi – Daugovpilī, Latgolys Centraluos bibliotekys filialē Jaunbyuvis bibliotekā, nūtiks ceļojūšuos izstuodis “Paātrinājums: latviešu grāmatniecības īsais ceļš no aizbildniecības līdz patstāvīgai nozarei 19. gadsimtā”[...]
17:00 Izstuodis “Baba, kurū škārsteikl... @ "New East"
Izstuodis “Baba, kurū škārsteikl... @ "New East"
Mar 19 @ 17:00 – 18:30
Baba ir Latgolys fenomens, kura oda zečis, skaita gazetys, marinej konservus zīmai, slauc gūvs i iz pīna golda nūdūd pīnu, ravej duorzu, cap špeka peirāgus i dora cytys lītys, kū babys parosti dora. Tok taidys[...]
17:30 Ture izstuodē “Gleizds, šķēres, ... @ Paula Stradiņa medicinys viesturis muzejs
Ture izstuodē “Gleizds, šķēres, ... @ Paula Stradiņa medicinys viesturis muzejs
Mar 19 @ 17:30 – 19:00
Muzeja pietneica – socialantropologe Anna Žabicka sovā stuostejumā par izstuodi pīsavērss veirīša (male gaze) i medicinyskajam (medical gaze) skatīņam iz sīvīti kai Gleizda muokslys, tai dokumentalajuos fotografejuos, kas beja nasaraunamai saisteitys ar juo dzeivi i[...]