Rokstu sagataveja: portals lakuga.lv

2018. gods 24. oktobrī viņ divdesmit ostoņu godu vacumā myužeibā nūguojs džeza kontrabasists, komponists i pedagogs Tuoms (Toms) Lipskis.

Tuoms Lipskis piec Juoņa Ivanova Rēzeknis muzykys vydsškolys beigšonys absolviejs Jāzepa Vītola Latvejis Muzykys akademejis džeza nūdaļu, kai ari tīpat turpynuojs magistra studejis. Tuoms beja vīns nu pīpraseituokūs džeza kontrabasistu Latvejā i sasadorbuoja ar daudzim i dažaidim muzikim i kolektivim – Latvejis Radejis Bigbendu, Raita Ašmaņa Jelgovys bigbendu, grupu “Framest”, Daumantu Kalniņu, Ievu Kerēvicu, Raimondu Paulu, Kristīni Prauliņu i cytim, kai ari daudzim uorzemu muzikim. Kai pastuoveigs dalinīks muzicēja vairuokūs projektūs – Toma Lipska kvintets, Rihards Lībietis Orchestra, “The Originals”, “Arcandela” i cytūs. Beja vīns nu festivala “Riga Jazz Stage 2018” spūžuokūs konkursantu. Paraleli stuoduoja ari Reigys Duoma kora školā kai džeza teoretiskūs prīškmatu pasnīdziejs. Itymā rudinī Tuoms atsagrīze Latgolā, kab Juoņa Ivanova Rēzeknis muzykys vydsškolā atteistātu džeza muzykys nūdaļu, kai ari suoce dorbu pi džeza festivala veiduošonys Lūznovys muižā.

2016. goda beiguos izguoja Tuoma kvinteta debeja albums “Holographic Projections”, kuruo īdviesmi muzikis roda nu Maikla Talbota gruomotys “Holografiskais vysums”. Sūpluok sovim skaņdorbim, Tuoms Lipskis aranžieja ari cytus dorbus, kurūs vydā jaunu skaniejumu dabuoja ari latgalīšu tautysdzīsmis.

Portala lakuga.lv kolektivs izsoka leidzjiuteibu Tuoma saimei, draugim i kolegim vysūs muzykys ceļūs.

Oktobrī Tuoma talantu i sapynus vēļ īmyužynuot īspieja Latvejis Radejis Latgolys studeja. 

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.