Rokstu sagataveja: lakuga.lv

27. oktobrī literaturzynuotnīks, žurnalists i dzejnīks VALENTINS LUKAŠEVIČS svietej 50. dzeivis jubileju. Syutūt sveicīņus svātkūs, napaseņ aicynuojom jū iz interveju (skaiti ITE). Valentina dzeja pamatuse pādus ari latgalīšu muzykā – pīduovojam lakuga.lv skaiteituojim nūsaklauseit pīcys dzīsmis, kuru vuordu autors (voi leidzautors) ir Valentins Lukaševičs.

1. SOVVAĻNĪKS – PA SKURSTINI BOLTI DYUMI

Dzīsme ar Sovvaļnīka (Ingara Gusāna) muzyku nu Sovvaļnīka pyrmuo, 2009. godā izguojušuo albuma “Sūpluok”.

2. INLAY – GAISMA KAI DĪNĀ

Dzīsme topuse eipaši festivalam “Muzykys Skrytuļs 2011”, muzykys autore Arita Strode-Kļaviņa. Grupa “Inlay” par itū dzīsmi dabuojuse latgalīšu kulturys goda bolvu “Boņuks 2011” nominacejā “Lobuokuo alternativuo (underground) stila dzīsme”.

3. DABASU DUROVYS – VEIKALA DADZYNUOŠONA

„Veikala dadzynuošona” ir pyrmuo dzīsme, kurā grupa izmontuojuse dzejūli. Dzejūļs – „Meikulam sābri nūdadzynuoja veikalu” atrūnoms latgalīšu postmodernista V. Lukaševiča dzejūļu gruomotā – „Bolti burti”. Dzīsme izdūta 2012. goda vosorā i atrūnoma grupys ūtrajā albumā “Styklu vītā skaņa”.

4. SOVVAĻNĪKS – AIZ AZARA BOLTI BĀRZI

Dzīsme ar Sovvaļnīka muzyku nu albuma “Sūpluok”. Dzīsmis teksta īdviesmis olūts ir latgalīšu tautysdzīsme ar taidu pošu nūsaukumu.  

5. POPARTS – MUNA SIRDS

“Poparts” ir projekts, kurymā apsavīnuojuši Guntra Kuzmina-Jukna i Ingars Gusāns. “Muna sirds” ir projekta debeja dzīsme, izguojuse 2013. godā. Dzīsmis tekstu radeit paleidziejs Valentins Lukaševičs.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.