Rokstu sagataveja: portals lakuga.lv

Nu 2. novembra da 8. decembra Rēzeknē, Preiļūs i Daugovpilī storpkultura dialoga veicynuošonai Latgolā nūtiks 12 koncertu sereja, kuruos atkluošona suoksīs jau itūnedeļ ar “HIP-HOP muzykys festo”, kurymā pīsadaleis hip-hop muokslinīki nu Rēzeknis, Daugovpiļs, Reigys, Preiļu i Ventspils, viestej bīdreibys “Latgolys Producentu Grupa” snāgtuo informaceja.

Koncertu serejis, kurū organizej bīdreiba “Latgolys Producentu Grupa”, mierkis ir ar dažaiduos volūduos dzīdūšu i atškireigūs muzykys stylūs spieļuojūšu muokslinīku tolkā īšonu veicynuot Latgolā dzeivojūšūs dažaidū tauteibu pozitivu sovstarpejū dialogu. Koncertūs Latgolys piļsātuos, Rēzeknē, Preiļūs i Daugovpilī, skanēs hip-hop, alternativuo, bluzroka, indie, klezmeru i eksperimentaluo muzyka kai itepat nu Latgolys, tai cytu Latvejis vītu, kai ari pīsavīnuos muziki nu Pūlejis i Ukrainys.

Jau itymā nedeļgolā, 2. novembrī Daugovpilī i 3. novembrī Rēzeknē, koncertu sereja tiks atkluota ar “HIP-HOP muzykys festo”, kurymā sūpluok vītejai hip-hop apvīneibai “Ausmeņa Records” (Rēzekne), varēs dzierdēt ari March (Ventspils), Fisha (Reiga), Bruolāns (Preili), Черное Перо (Daugovpiļs) i DJ Goodzh (Reiga). Koncertūs skanēs hip-hop muzyka latgaliski, krīviski i angliski.

Koncertu serejis kalenders:

02.11. – Daugovpiļs, muzykys klubs “Artilērijas Pagrabi”, HIP-HOP muzykys festo. Pīsadola: Ausmeņa Records, March, Черное Перо, Bruolāns, Fisha, DJ Goodzh.
03.11. – Rēzekne, “Ausmeņa Kebabs”. HIP-HOP muzykys festo. Pīsadola: Ausmeņa Records, March, Черное Перо, Bruolāns, Fisha, DJ Goodzh.
09.11. – Daugovpiļs, muzykys klubs “Artilērijas Pagrabi”. Alternativuos muzykys vokors. Uzastuos grupys “Inokentijs Mārpls” i “Piparmētra”.
10.11. – Preili, kebabs “Hasans”. Alternativuos muzykys vokors. Uzastuos grupys “Inokentijs Mārpls” i “Piparmētra”.
22.11. – Rēzekne, “Ausmeņa Kebabs”. Bluza-roka muzykys vokors. Uzastuos: “Holy Water” (Pūleja), Arnis Slobožanins.
23.11. – Daugovpiļs, muzykys klubs “Artilērijas Pagrabi”. Bluza-roka muzykys vokors. Uzastuos: “Holy Water” (Pūleja), Arnis Slobožanins.
24.11. – Preili, kebabs “Hasans”. Bluza-roka muzykys vokors. Uzastuos:: “Holy Water” (Pūleja), Arnis Slobožanins.
29.11. – Rēzekne, “Ausmeņa Kebabs”. Indie, folk i klezmeru muzykys vokors. Uzastuos “L’Chaim”.
01.12. – Daugovpiļs, muzykys klubs “Artilērijas Pagrabi”. Indie, folk i klezmeru muzykys vokors. Uzastuos “L’Chaim”.
06.12. – Rēzekne, “Ausmeņa Kebabs”. Eksperimentaluos muzykys vokors. Uzastuos duets “Агата Вильчик и Анна Минакова” (Ukraina).
07.12. – Daugovpiļs, muzykys klubs “Artilērijas Pagrabi”. Eksperimentaluos muzykys vokors. Uzastuos duets “Агата Вильчик и Анна Минакова” (Ukraina).
08.12. – Preili, kebabs “Hasans”. Eksperimentaluos muzykys vokors. Uzastuos duets “Агата Вильчик и Анна Минакова” (Ukraina).

Vysi serejis koncerti ir bezmoksys. Projektu storpkulturu dialoga veicynuošonai Latgolys regionā dorba aizdavumu programā finansiali atbolsta Latvejis Republikys Kulturys ministreja. Vaira dazynuošonai par koncertim: http://facebook.com/LatgolysProducentuGrupa.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.