Roksta autors: portals lakuga.lv

Muorteņdīnā, 10. novembrī, 13 stuņdēs Rībeņu nūvoda Gaļānūs aicynoj iz latgaļu arheologiskuo tārpa gūdynuošonys svātkim.

Pavasarī Gaļānūs tyka gūdynuots Ivetys Seimanovys darynuotais Vydsmuižys 19. godu symta ūtruos pusis sīvys tautystārps. Piečuok meistare givuos pi latgaļu arheologiskuo tārpa rekonstrukcejis, tū veidojūt piec Zeimuļu kopulauka sastuo sīvīšu kopa, kas datejams ar 10. godu symtu. Fondūs beja sasaglobuojs pīteikami daudz materialu, kab varātu tārpu rekonstruēt. Vīneigais, kuo pītryucs pylnai tārpa konplektacejai, beja jūsta, partū tei “aizajimta” nu vystyvuokuo, kas arhivā atrosts, – nu Aizkaļnis , stuosta I. Seimanova.

Ivetys Seimanovys dzymtuo vīta ir Gaļāni aba kuodreizejuo Vydsmuiža, bet vaira kai 20 godus jei ar saimi dzeivoj Reigā, tok vysod īguodoj par sovu dzymtū nūvodu. Gon Vydsmuižys etnografiskais sīvys tārps, gon latgaļu sīvītis arheologiskais tārps ir Ivetys duovona Latvejai tuos symtgadē.
Senejuo tārpa gūdynuošonys svātki suoksīs 12 stuņdēs ar Svātū Mišu Vydsmuižys katuoļu bazneicā, 13 stuņdēs Gaļānu Kulturys nomā sasatikšona ar kulturys viestneicu Ivetu Seimanovu, arheologi Iritu Žeiri i rūtkali Ugi Dravu. Iz pasuokumu kai īejis biletus aicynoj jimt leidza rokstainūs cymdus.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.