Rokstu sagataveja: portals lakuga.lv

Izdūts Kuorsovys nūvoda viesturei veļteits akademiskys rokstu kruojums “Kārsavas stāsti”. Tuo prezentaceja nūtiks 24. novembrī 11 stuņdēs Kuorsovys Kulturys noma vestibilā i 29. novembrī 16 stuņdēs Reigā Latvejis Nacionaluos bibliotekys Latvejis symtgadis informacejis centrā, līcynoj informaceja Kuorsovys nūvoda sātyslopā.

Rokstu kruojums aktualizej vaicuojumu par nūvoda viesturi, kulturys montuojumu i socialū atmiņu. Rokstu kruojumā “Kārsavas stāsti” pyrmū reizi apkūpuoti pietejumi par Kuorsovys nūvoda arheologiskajom vītom, muižu sistemu, dzeļžaceļa viesturi, religiskajom draudzem i 20. godu symta karu nastajom puormaiņom. Kuorsova izaruoda boguota ar sovim kulturys montuojuma objektim, kas sasaglobuojuši leidz myusu dīnu, – bazneicom, muižom, dzeļžaceļa infrastrukturu, ari ar stuostim, tradicejom i viesturi. Pietejumus veikuši sovys jūmys profesionali – arheologs i profesors Jurs Urtāns, viesturneica Tatjana Bogdanoviča, industrialuo montuojuma eksperts Toms Altbergs, viesturis doktore Inese Runce, filologejis doktore Svetlana Pogodina, viesturnīks Aigars Urtāns.

Pietejums ir duovona Kuorosvys nūvoda īdzeivuotuojim i nūvoda viesturis interesentim piļsātys 90 godu jubilejā i Latvejis symtgadē.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.