Rokstu sagataveja: portals lakuga.lv sadarbeibā ar bīdreibu “Latgolys Producentu Grupa”

Šudiņ pasauļam jaunu videoklipu atruoda grupa “Trešīs Ņutona lykums” – sataiseita video verseja dzīsmei ar Ontona Slišāna vuordim “Pi raja vuortu”, viestej grupys publicātuo informaceja. 

Tai kai dzīsmis “Pi raja vuortu” teksts jimts nu Ontona Slišāna, kuram itūgod svieteitu septeņdesmit godu jubileju, erotiskuos dzejis kruojuma “Salve Regina” – klipā grupa raudzejuse akceņtēt diveju cylvāku tīkšonūs vīnam da ūtra i saplyusšonu vīnā gareigā i emocionalā vasalumā. Dzīsmis muzykys autors ir Guntis Rasims.

Videoklipā fiļmiejušīs Daina Kudravska i Edijs Rancāns, sīnys zeimiejumu taisejuse Elīna Puncule, klipa režisore i operatore Viola Lapa, montažu taisejs Guntis Rasims. Klipa topšonys naradzamī lobī gareni – puorejuos grupys dalineicys Laura Kudravska, Sintija Augustova i Laura Viškere. “Trešīs Ņutona lykums” lelu paļdis par klipa topšonu soka veikala “DEPO” kruosu nūdalis darbinīkim par diskuseju i konsultaceju, Edija i Dainys saimem i Juoņam Kuzminskim par muokslys atbaļsteišonu – atļuovi zeimuot iz jūs eipašumim. Dzīsme “Pi raja vuortu” īraksteita “Bieržgaļa skaņu laboratorejā” (īrakstejs Guntis Rasims), dzīsmis mix i master – Nick Dawes, “La Source Studio”.

Grupa “Trešīs Ņutona lykums” sovu darbeibu suokuse 2013. goda 18. septembrī Rēzeknē. Grupā muzicej pīcys mārgys nu Rēzeknis nūvoda – Laura Viškere, Sintija Augustova, Viola Lapa, Daina Kudravska i Laura Kudravska, bet grupys nūsaukums nav truopejīs najauši – “Trešīs Ņutona lykums” ir “darbeibys i pretdarbeibys lykums”, kas cīši truopeigi paruoda taišni grupys sīviškeigū byuteibu. Ituo goda rudinī grupa nūsvieteja sovu pīcu godu jubileju, par sevi pasasmejūt, ka pīcu godu vacums bārna psihologejā ir “pļuopuošonys i jautuojumu izdūšonys periods”, teikūt puorbaudeiti rūbeži. Tys asūt normals atteisteibys pūsmys, kas gon prosa lelu vacuoku pacīteibu. Grupa tik par itū nūsmej: “Augom!”. “Trešīs Ņutona lykums” itūs godu laikā jau ir sakruojuse gona lelu pīredzi kai vysaidūs jaunūs grupu festivalūs i konkursūs, tai ari pīsadalejuse Latgolā svareigajuos nūtikšanuos – festivalā “Muzykys Skrytuļs”, festivalā “Upītes Uobeļduorzs”, kai ari “Latgalīšu volūdys naktī”, atzeimejūt Latgolys kongresa symtgadi pārn.

“Pi raja vuortu” ir catūrtais grupys videoklips – video versejis topušys ari dzīsmem “Muns/muna”, “Mozuo gūvs”, “Cuoleic” (DJ Guntix cover). Grupys jaunumim leidza dzeivuot var socialajā teiklā Facebook ite: facebook.com/tresis.nutona.lykums

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.