Rokstu sagtaveja: portals lakuga.lv

Bīdreiba “Latgolys Saeima” sadarbeibā ar bīdreibu “Dienvidlatgales NVO atbalsta centrs” realiziejuse projektu “Storpkulturu dialogs Latgolys mozuokumtauteibu vydškoluos”. Projekta laikā latgalīšu kulturys i sabīdriskī darbinīki apmeklēja ostonis Latgolys mozuokumtauteibu i bilingvaluos apvuiceibys vierzīņa školys.

Bīdreiba gasteja Rēzeknis 3. vydškolā, Rēzeknis 6. vydškolā, Rēzeknis Vaļsts pūļu gimnazejā, Maltys vydškolā, Tyskadu vydškolā, Kruoslovys Varavīksnis vydškolā, Daugovpiļs J. Raiņa 6. vydškolā i Daugovpiļs Saskanis školā, portalu lakuga.lv informej “Latgolys Saeimys” puorstuovs Guntis Rasims.

Tikšonuos tyka organizātys strukturātuo dialoga lekceju formā. Mozuokumtauteibu jaunīši tyka īpazeistynuoti gon ar Latgolys i latgalīšu viesturi i folklorys, literaturys boguoteibom, gon ari tyka stuosteits par latgalīšu volūdys lītuojumu sabīdriskajā telpā i myusdīnu latgalīšu kulturys teņdeņcem. Klauseišonuos viereiba tyka puorbaudieta konkursu veidā, atsokūt iz vaicuojumu par dzierdātū i sajamūt par tū muzykalys pīminis bolvys. Taipat jaunīši dūmuoja idejis Latgolys “superkomandys” modeļa izveidei, kotrai tauteibai akceņtejūt juos stypruokuos eipašeibys, kai, kūpeigi dorbojūtīs, varātu veicynuot Latgolys regiona kūpeigu atteisteibu nuokūtnī. Mozuokumtauteibu jaunīšim īpazeistūt Latgolys latvīšu (latgalīšu) mentalitati, tyka raudzeits jamūs vaira styprynuot gon lokalpatriotismu, gon ari pīdereibys sajiutu Latvejai i patriotismu.

Ar jaunīšim školuos tykuos sabīdriski aktivi latgalīši – muzikis i viesturnīks Arņs Slobožaņins, sabīdriskais darbinīks Jurs Viļums, muzikis i kulturys projektu vadeituojs Guntis Rasims i žunalists Teņs Bikovskis.

“Jaunīši nu mozuokumtauteibu školom atzyna, ka cīši moz ci nimoz nabeja nikuo dzierdiejuši par myusdīnu latgalīšu kulturu. Iz vysa leluokū interesi jaunīši izruodeja par myusdīnu latgalīšu muzykys klipim. Gondreiž kotrā klasē beja kaids jaunīts, kura dzeds ci baba ir latgalīši,” puordūmuos doluos Guntis Rasims.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.