Rokstu sagataveja: portals lakuga.lv

Kapelys “Dziga” rodūšajā dailradē 2018. gods ir eipašs, partū ka goda beiguos izīs kapelys “Dziga” septeitais tautys muzykys albums “Gostūs”. Jimā īkļautys vīnpadsmit latvīšu, latgalīšu i nazcik cytu Eiropys vaļstu tautu kadriļu melodejis, informej pošvaļdeibys agentura “Rēzeknes Kultūras un tūrisma centrs”.

Kapela nu juos dybynuošonys 1992. godā īsakļaun tūs kolektivu pulkā, kuri na viņ izpylda folkloru koncertūs i vysaidūs pasuokumūs, bet ari poši aktivi pīsadola muzykaluos folklorys vuokšonā, apzynuošonā i juos populariziešonā.

Pīcu godu laikā, kai īskaņuots pādejais kapelys muzykys diskys, “Dziga” ir sakruojuse jaunu muzykalū materiālu. Albumā ir na tikai latgalīšu, bet ari cytu tautu tautys muzykys “pērlis”, kas atsakluoj tuo nūsaukumā “Gostūs”. Muzykalū materialu kapela ir “apspieliejuse” koncertūs i vysaidus ar tradicionalū kulturu saisteitūs pasuokumūs i tai izakristalizej interesantuokais, spūdruokais, stilistiski vysaids muzykalais materials, kuru beja vārts īskaņuot.

Jaunais albums ir byutiski svareigs na viņ kai aplīcynuojums kapelys radūšai darbeibai, variešonai i jaunradis procesu veicynuošonai, tys ir byutisks kai līceiba ituo laika kapelys skaniejumam, daudznacionaluos muzykaluos folklorys dokumeņtiešonai i populariziešonai, kai ari aplīcynuojums Rēzeknis folklorys kolektivu mierktīceigai i kvalitativai darbeibai folklorys pietnīceibā, dokumeņtiešonā i populariziešonā.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.