Rokstu sagataveja: portals lakuga.lv

Tiuleņ jau kluotyn kas gods lelim i mozim cīši gaideitī svātki – Zīmyssvātki i Jaunais gods. Itūreiz pīduovojam taišni itam laikam pīdareiguos dzīsmis – desmit kompozicejis par zīmu, snīgu (kai vysod svareigs ir vaicuojums, voi Zīmyssvātkūs tys byus) i par pošim Zīmyssvātkim. Tūs vydā drupeit sirsneibys, drupeit jūku, drupeit boltuma i drupeit izzynuošonys.

1. KREIT BOLTS, PŪKAINS SNĪGS

Dzīsmis autore i izpiļdeituoja Laura Bicāne.

2. ATĪDAMI ZĪMASSVĀTKI

Folklorys draugu kūpys “Vīteri” dzīsme i video nu 2011. godā izguojušuo albuma “Samovars”.

3. TIK LĀNAI KAI MUNYS DŪMYS

Vīna nu skaistuokūs dzīšmu ar zīmys nūskaņu latgaliski. Dzīsmis autors Uģis Vilcāns nu Preiļu, ari grupys “Inde Indive” dalinīks. Dzīsme radeita vaira kai pyrms 10 godu.

4. ZĪMYSSVĀTKU LAIKS

Latgalīšu/franču pankroka apvīneibys “Yann & Latgalians” vīns nu Zīmyssvātku hitim. Sovulaik treis godus piec kuortys apvīneiba nu Daugovpiļs izdeve eipašūs Zīmyssvātku hitus. 2013. godā izguoja da ituo pādejuo dzīsme “Rezervis Zīmyssvātki”, sūlejūt, ka carams piec četru godu ap Zīmyssvātkim byus gaidoms turs pa Daugovpiļs, Reigys i Līpuojis klubim, prezentejūt debeja albumu “Panku Zīmyssvātki”. Godi paguojuši, bet ar debeja albumu apvīneibai vyss vēļ prīškā. Itūreiz pyrmais nu “Yann & Latgalians” Zīmyssvātku hitu – “Zīmyssvātku laiks”.

5. PI EGLEITIS

Rēzeknis nūvoda vokaluos studejis “Skonai” jaunuokuos grupys dzīsme “Pi egleitis” nu pārn izguojušuo albuma “Rūtaļa”, kas veļteits dzejnīka Ontona Slišāna pīmiņai. Dzīsmis muzykys autore ir studejis vadeituoja Guntra Kuzmina-Jukna, bet vuordu autors – Ontons Slišāns.

6. PAR LATGALĪŠIM (SVĀTKI)

Sovulaik popularuos grupys “Likteneigais pagrīzīņs iz Vainovu” (L.P.I.V.) dzīsme “Par latgalīšim” (Svātki). Grupys atpazeistamuokuo dzīsme vēļ arviņ ir “Opeļs”. Dzīsme na tikai par Zīmyssvātkim, bet i cytim svātkim.

7. SVĀTKI GUOJA

Dzīsme nu grupys “Laiksne” albuma “Es čigāna meita biju”, kurs izguoja 2013. godā, gūdynojūt ari grupys 20 godu darbeibys jubileju. Dzīsmē pasaruoda vīna nu eipaši Latgolā rakstureigūs Zīmyssvātku laika tradiceju – čyguonūs īšonu.

8. ZĪMYSSVĀTKI

Apvīneibys “Jezups i Muosys” svātku laika hits “Zīmyssvātki” nu albuma “LAI SLAVA JAM!”.

9. LAUŽAT SKOLUS, PYUŠAT GUNI

Zīmyssvātku dzīsme nu Osyuna. Dzīd i spieļoj folklorys kūpa “Grodi”.

10. NAKTS VYDĀ JAUKI BOLSI

Dzīsme nu albuma “Dzīsmis ap Dīva Pīdzimšonu”. Albumā atrūnomys 14 senejuos katuoļu Zīmyssvātku dzīsmis, kuruos īdzīduojuse Vactiļžys pogosta folklorys kūpa “Saime”. Albuma idejis autors i izdeviejs bazneickungs Aigars Bernāns par īrokstu soka: “Nu aizmiersteibys asam cāluši senejus vuordus i bolsus, kū modernais pasauļs jau ir aizmierss. Myusu vacī ļauds juos zynuoja iz pruota i Zīmyssvātku laikā dzīduoja na tik Latgolys bazneicuos, a i sātā voi īdami cyts iz cytu gostūs kaladuot. Vairuokuos paaudzēs ituos Zīmyssvātku dzīsmis Latgolys katuolim beja vīneiguos, cikom 20. gs. 30. godūs pasaruodeja jaunuokys, kuo melodejis niu pazeist vysa Rītumeiropa i vēļ tuoļuok. Vacuos bazneicys dzīsmis ap Dīva Pīdzimšonu tyka napeļneiti aizmierstys. Patīseibā juos ir unikala vierteiba, kas latgalīšūs veiduoja pīdareibys sajiutu na tikai Dīvam, Bazneicai, sovai saimei, a i myusu Latgolai.”

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.