Roksta autors: Inga Čekša-Ratniece, žurnals “A12”

Itaidu skotu var vāruot gar Suomejis–Krīvejis rūbežu ceļā nu Suomejis Suomussalmi piļsātys iz Kuusamo. Pyrma 24 godu Reijo Kela pļovā suoce veiduot sovpateigu bīdaklu ekspoziceju. Nu dažu desmišu jei ir palykuse par varonu armeju. Žurnala “A12” radūšuo grupa gon nasuoce jūs skaiteišonu, tok apjūms līcynoj, ka jūs jau ir symtim, varams, pat tyukstūšom.

Garombrauciejus vosorys mienešūs bīdakli pīsaista ar sovu kruosu daudzveideibu, tok zīmā, kai teic vītejī īdzeivuotuoji, jī atguodynoj snīga cylvāku armeju. Varonais skots pīsaista cylvāku viereibu, pīstuojūt ceļa molā i jū īmyužynojūt mobiluo telefona aparatā. Nūprūtams, ka vosorys mienešūs ite dorbojās ari kafejneica, tai pīvylynojūt turistus i Suomeju paruodūt juos daudzveideibā. Itaida izdūma viņ līcynoj par suomu radūšu pīeju vītejuos dobys īpazeišonai, cik nu var baudeit Suomejis naskartū floru i faunu, vajag ari kaidu rozini. Tok juosoka, ka byut bīdaklu īlankumā gona ar vīnu reizi. Sajiutys ir drupeit sovaidys, pat baisys, atguodynojūt karaguojīni ci cylvāku masveida izvesšonu.

Kai jau daudzvīt pasaulī, ari pi mums duorza ci teiruma molā sastateitī bīdakli dūmuoti putnu i dzeivnīku atbaideišoanai. Pyrma nazcik godu presē beja informaceja, ka ceļā nu Kuldeigys iz Saldu kaidā autobusu pīturā nūlykts bīdaklys, maldynuodams sabīdryskuo transporta šoferus. Sovutīs iz Jiurkaļnis šosejis rāgojūtīs bīdaklys ceļu policista izskotā. Tī ir viņ daži pīmāri, kas pīgrīzuši sabīdreibys viereibu: bīdaklys kai bīds konkretam mierkam ci ari muokslys instalaceja. Tok zemnīki teic, ka parosti bīdynuošonys funkcejai nav gars myužs. Mežacyukys, lopsys, stiernys, zači, kai ari zvierbuli, vuornys, bolūži, kaijis i cyti putni dreiži saprūt, ka bīdaklys navar radeit realus draudus. Lelbritanejā kaids zemnīks itam dorbam nūleiga studentu. Saskaņā ar www.metro.co.uk informaceju, 22 godus vacais jaunīts bīdynuoja ierbis nu rapšu teiruma, nedeļā peļnejūt 250 mārcenis, par kū jū daži apskaude, cyti pīzyna par čudnu. Kuortejī pīmāri aplīcynoj, ka cylvāka izdūmai nav rūbežu. Ari vajadzeibys nav vīnnūzeimeigys: ci deļ apstuokļu, ci vīnkuorši deļ iztēlis radeitys.

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta leidzekļu projektā “Robežlīnijas”.