Roksta autors: Inga Čekša-Ratniece, žurnals “A12”

Vys aktivs darbeibā, vodūt i Rēzeknis Muokslys i dizaina vydsškolu, i vuicūt studentus Latvejis Muokslys akademejis Latgolys filialē, i rodūt jaunys gleznys, ir muokslinīks i profesors Osvalds Zvejsaļnīks. Sagaideidams sovu dzeivis 75 godu jubileju, jis reikuoja vairuokys izstuodis. Juosoka, ka muokslinīks jau nu 1971. gods pīsadalejs vysmoz 80 vītejuo, regionaluo, vaļsts i storptautyskuo mārūga izstuodēs, bejušys vaira kai 40 personalizstuodis. Nadreikst damierst juo īguļdejumu ari popularajā muokslys filmā “Cilvēka bērns”.

Par Osvalda Zvejsaļnīka darbeibu kinys jūmā turpynoj latvīšu kinorežisors Juoņs Streičs: “Myus vīnuoja filma “Cilvēka bērns”, kurai Osvaldu izalaseju par muokslinīku, koč jam itymā dorbā nabeja pīredzis. Tok beja i pīsajēme spākā daudz kas vaira. I taišni: Osvalds ir senejuos latgaļu ciļts gora maņtinīks, bez bravurys i skaļuma, kaids tymūs godūs suoce vairuotīs. I bez kompleksu, kuri ēde tryuceigūs Latgolys censūņus, kod jī izguoja tautā. Viesture ir gona pasaryupejuse, kab par mums radeitu oplomys legendys, a leluokais pūsts nu jūs ir pošu latgalīšu da vaimanuošonys par tautu buorineiti, par trešū zvaigzneiti Latgolu, kur vuorgi i atpaliceiba. I beja pat tai, ka vīnai slovonai myusu nūvadneicai jau gotovuo filma “Cilvēka bērns” nabeja pījamama viņ partū, ka kūpā ar Zvejsaļnīku asam puoruok idealiziejuši Latgolu. Nu nikuo taida! Bet, ka jau filma ir skaista i gaiša, tod viņ partū, ka taida ir Osvalda i muna Latgola. Tai mes jū izjiutam i saprūtam i taidu attaisejom vysai Latvejai. Taida beja poša pyrmuo myusu vīnuošonuos, kod suocem dorbu. Vīnuošonuos par Latgolu kai Latvejis goraspāka olūtu, par lelū i senejū ciļti, kas davuse myusu vaļstei vuordu, volūdu i sorkonboltsorkonū karūgu. Latgola ir muociejuse sovu goru davīnuot katuoļu bazneicai i taišni ar tū dabuojuse sovu eipašū raksturu, dzeivisveidu i sovu pošizpausmi i sadzeivis kulturā, i muokslā. Tys juojam vārā, kod gribi izsaceit sovu nūvodu muokslā, – tai jis skaidruoja skateituojim myusu filmys panuokumus pyrmizruodis dīnā Rēzeknē. Jau nu pošys pyrmuos īsapazeišonys es Osvaldā īraudzeju dedzeigu Latgolys patriotu i viņ tod atkluoju unikalu gleznuotuoju. I niule tys ir kūpā: i juo myužs Latgolai, i izcylais gleznuotuoja talants, kas Latgolu gūdā ceļ. Osvalds nu bārnu dīnu ir apsazynuojs sovu dižciļteibu i partū myusu ilguos draudzeibys laikā ni reizi naasmu nu juo dzierdiejs bravureigū: “Vot, mes latgalīši! Mes jums paruodeisim!!” Osvalds par itū urrāpatriotismu viņ pasmaida. Parkū tik histeriski juosabļausta, kod Latgolys dižciļteiba pleivinej myusu vaļsts karūgā i skaņ myusu volūdā? Osvalds jū dzierd, redz i jiut sovā sirdī.”

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta leidzekļu projektā “Robežlīnijas”.