Roksta autors: Ināra Volkova, žurnals “A12”

Latgolys lauku ainova nav īdūmojama bez sātu, kurys bīži viņ vīna ūtrai tik tyvu saaugušys kai sieņs mežā ar jūs dvieseliskajim dzeivisstuostim. Sātys sajiutu rodom mes sevkurs ar sovu dorbu i apleicejuos dzeivis telpu.

Daudzus nu myusu bīži viņ dzeive nūvad tuoli nu sovys sātys. Tradicionaluo Latgolys lauku ainova ir izgaistūša, partū byutiski ir dokumentēt tū pyrmatnejū, bet pamastū lauku vīnsātu veidūlu, kuru nu zemis viersa vēļ nav nūāduši lauki ci kryumi. Preiļu Viesturis i lītiškuos muokslys muzejs ir apkūpuojs lauku sātys i kūka lūgu kvarbatkys Preiļu pusē, Rēzeknis piļsātā kūka sātu apbyuvis sovpateibys ir dokumentiejuši Rēzeknis Muokslys i dizaina vydsškolys jaunī restauratori. Ari Dīnvydlatgolys lauku ainova ir saglobuota viesturiskā gruomotā.

Par lauku sātom stuosta Daugovpiļs nūvoda kulturys puorvaļdis i Skryndu dzymtys muzeja izdūtuo gruomota “Viensētu koka arhitektūras savdabība Dienvidlatgalē”. Anna Lazdāne pastreipoj, ka bolstūtīs iz dašamejūs muzeja veiktajūs pietejumūs īgiutū materialu apkūpuojumu i analizi, ir izveiduots kruojums par kūka arhitekturys montuojuma sovpateibu Dīnvydlatgolys ainovā. Tys ir daudzpuseigs specialistu redziejums asūšuos situacejis izpietē, kai ari plašs foto dokumentacejis materials i regionā dzeivojušūs īdzeivuotuoju stuostejumi. Kruojumā atrūnami detalizāti materiali i par dzeivojamūs sātu ansambļu, i atsevišku āku i jūs detaļu, i kūka rūtuojumu tematiku. Kūka arhitekturys montuojums īgiust sentimentalu tradicionalys kulturainovys nūskaņu. Kūka āku īmītnīku tradicejom apveituo dzeive, kurys darbeibys rezultats atsaspīgelej lauku ainovā, vys vēļ ir apbreinys vārta. Kulturviesturiskuo montuojuma daudzveideiba veidoj sevkurys tautys boguoteibu. Kulturainova veidojās na viņ nu byuvu asameibys, bet ari juos nūvītuojuma dobys vidē, cylvākim, kas atbylstūši sovom tradicejom i redzīnim izmontoj i dzeivojamuos ākys, i jūs apleicīni, vīnlaiceigi atsarūnūt vysaidu viesturiskūs nūtykumu vierpulī. Ākom i jūs nūvītuojumam palīkūt par lauku ainovys sastuovdaļu, juos veidoj konkretuos vītys īdzeivuotuoju identitati.

Pietejumus i materialus par tradicionalū Latgolys lauku vīnsātu ainovu var īpazeit regionalajuos lauku bibliotekuos i muzejūs, kai ari informativī materiali ir daīmami sātys lopā www.lakuga.lv i www.a12.lv .

Roksts sagataveits ar Vidis regionaluos atteisteibys agenturys finansialu atbolstu nu Latvejis budžeta leidzekļu projektam “Sabiedrības un reģionu robežlīnijas žurnālā A12”.