Roksta autors: Ināra Volkova, žurnals “A12”

Pādejūs godu laikā Latgolā teik atjaunuots kūka kulturys montuojums. Kai spūdruokī pīmāri tam ir Ludzys Leluo sinagoga i Rēzeknis Zaļuo sinagoga. Taišni kūka arhitektura atspūguļoj vysaidu tautu i redzīņu ītekmis i raksturus. Arhitekts Pēteris Blūms kulturys pīminekļu aizsardzeibys jūmā dorbojās nu 1978. gods, i uzsver, ka arhitekturys montuojums itymā regionā eipaši nav pieteits, izjamūt gruomotu sereju par Latgolys kūka bazneicom.

“Es bīži braukoju iz vysaidom vītom i ākom, maņ gribējuos saprast tuos ākys. Ar kū atsaškir, par sevkuru apmekliejumu raksteju atskaitis, skicieju, fotografieju. Kur es pateišom jutūs breivi, tys ir – meklejūt, dorūt i kruojūt tuos pošys autentiskuma sajiutys. Īraudzeit eistu montu tī, kur tuo nivīns nav īraudziejs. Tys ir piļneigi vīnolga, ci tys Tenerifē, ci Tomskā, ci tys byus Rēzeknē. Tam nav nūzeimis. Bet ir nūzeime tū pasaceit cylvākim, kuri ir kūpā ar tevi. Tys nav viņ maņ, es kolekcioneju tū vierteibu i varu atdūt jim, jī izzynoj par tū, ka taida ir. Jī izzynoj kaidu jaunu aspektu, kū jī pyrma nav nūjautuši. Jī tī ir nūdzeivuojuši vysu myužu, tys vysu laiku tī ir, nu i? Tod, kod tu izstuosti jam, kas tys patīseibā ir, cylvākam pieški atauš, mes tok tuo nimoz nazynuojom. Es bīži cylvākim stuostu par itom lītm.”

Vacuos ākys i vierteibys, kurys juos globoj, arhitekta izpratnē roda pīdereibys sajiutu, ļaun jiutom byut boguotuokom, spieceiguokom, spūdruokom. “Tod mes asam gotovi redzēt i baudeit, kū garom īmūt bez mīlesteibys nikod naīraudzeisi, partū, ka tys tevi nainteresej. Tei ir tei mīlesteiba. I tys nav svareigi, ci tei ir mīlesteiba pret kaidu cylvāku ci kaidu vītu, tei ir dzeivis boguoteiba. Arhitektura ir vīna daļa.” Sinagogu atjaunuošona ir ari viertiejums par tū, kū piļsātu viesturiskajai atteisteibai ir nūzeimiejuši ebreji. Atjaunuotuos ākys stuosta ari par kulturys i sadarbeibys izpratni, partū ka ir saglobuojuse vacūs laiku līceibys. P. Blūms uzsver, ka loba restauraceja ir pamuocūša, kab daudzi cylvāki spātu saprast vacūs lītu vierteibu. “Tys nav, ka jaunu byuvēt ir lobuok. Tei ir taida vierteibys deklaraceja. Tei ir īspieja īsavērt cytā pasaulī i jei ir interesanta i sovpateiga. Partū ka vuordu “sinagoga” jau natulkoj kai bazneica, tuos ir školys, tū sauc par šyunu, tei ir škola, kur vuicejuos dzeivis gudreibu. Kūpā ar “Goru” – koncertzali, “Zeimuli”, tys ir tryukstūšais gabaleņš kulturvidis ainai Rēzeknē – kab tys byutu pylnvierteigs: koncertzale ir izklaidis daļa, tei ir tei myusu dīnu kulturu fiksejūšuo daļa, tī teik atspūguļuota. “Zeimuļs” – tei ir izgleiteiba, sinagoga – tei ir paguotne. Tai veidojās spāka trejstyurs.”

Roksts sagataveits ar Vidis regionaluos atteisteibys agenturys finansialu atbolstu nu Latvejis budžeta leidzekļu projektam “Sabiedrības un reģionu robežlīnijas žurnālā A12”.