Rokstu sagataveja: portals lakuga.lv

Preiļūs 6. aprelī nūtiks seminars par Latgolys fotografu darbeibys viesturis izpieti i datu apkūpuošonu. Mierkis ir izdūt enciklopedeju par Latgolys fotografim. Seminarā pīsadaleit aicynoj pošvaļdeibu īstuožu puorstuovus i sevkuru interesentu, informej organizatori.

Fotografs Igors Pličs kūpā ar dūmubīdrim pīsavierss Latgolys fotografu darbeibys viesturis izpietei i datu apkūpuošonai, tai atkluojūt i popularizejūt itū da šam pīmierstū Latgolys viesturis tematu.

“Ir zynomi daudzi fotografi nu dažaidu Latgolys vītu, kuri ir autorizāti ar zeimūgim, spīdūgim ci logotipim iz fotografeju. Tymā pošā saļtī informacejis par pošim fotografim ir cīši moz. Ir pamats dūmuot, ka daudz informacejis varātu byut Latgolys nūvodu muzejūs i bibliotekuos, Latvejis foto i viesturis muzejūs, taipat pi kolekcionaru, fotografejis entuziastu i privatpersonu,” soka Igors Pličs. Jis pastreipoj, ka fotografu atstuotais montuojums ir nanūviertejamys līceibys par aizguojušajim laikim: “Vīna nu fotografejis svareiguokūs funkceju ir fiksēt viesturi i atstuot vizualus pīruodejumus par paguotni. Itī omota bruoli ir peļnejuši, kab mes jim izruodeitu cīnu, pīsavieršūt informacejis apkūpuošonai par jim, kai tys ir daudzvīt Latvejā i cytur pasaulī. Partū teik reikuots seminars, iz kuru lyudzam Latgolys pošvaļdeibu puorstuovus i interesentus, kab pasadaleitu ar asūšū informaceju, izzynuotu kū jaunu i, vysbeidzūt, kab mes varātum apkūpuot informaceju par sovim omota bruolim Latgolā.”

Dalinīkus aicynoj sagataveit zynomūs fotografu sarokstus i prezentaceju par vysmoz vīnu īspiejami zynomū fotografu, kas ir dorbuojīs dalinīka apleicīnē. Gola rezultatā ir planavuots izdūt enciklopedeju par Latgolys fotografu darbeibys viesturi.

Seminars nūtiks Preiļu nūvoda Kulturys centrā (Raiņa bulvars 28), daleiba seminarā ir bez moksys. Suokums 10 stuņdēs, registriešonuos nu 9 stuņžu. Interesentus aicynoj sovu daleibu pīsaceit leidz 2019. goda 28. februaram, breivā formā nūruodūt vuordu, pavuordi, telefona numeri, e-posta adresi i atsarasšonys vītu, kai ari pīsaceit prezentacejis temu. Pīsasaceišona i vaira informacejis pi Igora Pliča (29121689; lauraplus@inbox.lv).

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.