Roksta autors: portals lakuga.lv

Decembra vydā piec diveju godu pauzis nu īprīškejuos reizis izguojuse jaunuokuo Latvejis naatkareigūs grupu izlase “Odekolons” ar ailis numeri 16. Izlasē ūtrū reizi īkļauti ari skaņdorbi latgaliski.

Izlasis “Odekolons” sastateituojs ir grupys “Inokentijs Mārpls” liders Raimonds Lagimovs aba muzykys aprynduos lobuok pazeistams kai Dambis. “Odekolons” izlašu serejā teik apkūpuotys spylgtuokuos Latvejis naatkareiguos muzykys nūtikšonys i teņdeņcis. Itūreiz 24 dzīšmu, kuruos pamatā īraksteitys pādejūs diveju godu laikā, nu ir i pa kaidai senejuokai, vydā sūpluok taidom apvīneibom i muzikim kai “Baložu pilni pagalmi”, “Satellites LV”, Evija Vēbere, “Jūdas graši”, “Dzeltenie pastnieki”, Imants Daksis i cyti tykušys ari divejis muzykys apvīneibys, kuruos dzīd latgaliski – “Gandreiž 10nīkā” ar dzīsmi “Traktoru pavieļnīks” i projekts “Kapļi” ar dzīsmi “Valērija Seile”. Īprīškejā izlasē “Odekolons #15”, kurei izguoja 2016. godā, beja īkļauta projekta “Kapļi” dzīsme “Drycanu mopedistu banda”.

Vierteiguo izlasis daļa – mini gruomateņa, kurymā apkūpuota ari informaceja par vysom izlasē īkļautajom grupom, tai pi reizis tū var daskaiteit kai Latvejis naatkareiguos muzykys kusteibys līceibu. Albuma vuoceņu zeimiejuse Kerija Arne, izlasis masteru taisejs Olivers Tarvids, bet datorsalykuma autors – Silvestrs Ūsiņš.

Itaidu kasgadeju naatkareiguos muzykys izlašu sereju 1992. godā suoce izdūt pagreidis izdevnīceiba “TORNIS Rec.” zam nūsaukuma “Eau de Cologne”, nu 1995. godā izlasis izdūšonu sovuos rūkuos puorjēme Dambis pi reizis ari latvyskojūt tuos nūsaukumu.

Kapļi – Valereja Seile. Ideja par dzīsmi roduos 2016. goda beiguos, grupys liderim Oskaram Orlovam (Raibīs) i Arņam Slobožaninam sasateikūt “Kapļu” bazē i mieginuojumu telpā Bozuovā, kur dzyma dūma alternativā manīrē īpazeistynuot klauseituojus ar vēļ vīnu izcylu latgalīšu sabīdryskū darbineicu Valereju Seili. Reizē dzīsmē teik pīmynāts i kuortejū reizi “izvasts nu skapa” ari “vadūņs” Kārlis i nazkodejais Latvejis uorlītu ministrs Vilhelms Munters. Dzīsmis īrokstā pīsadalejuši: Arņs Slobožanins (gitara), Elgars Ludboržs (gitara), Rasma Kulamova (tausteni), Oskars Orlovs (bolss), Zurabi Ivanāns (bass) Andris Jurāns (bungys). Īroksts taiseits skaņu īrokstu studejā “Bozova”. Miksēja Armands Treilihs. Videoversejis autors – Artūrs Slišāns.

Gandreiž 10nīkā – Traktoru pavieļnīks. Alternativuo pankroka grupa nu Rēzeknis nūvoda Kaunatys pogosta – “Gandreiž 10nīkā” (G10) pārn rudinī nūsvieteja sovu pīcu godu jubileju. Grupa spieļoj sovys dzīsmis, paruodūt dažaidū dzeivi laukūs. Dzīsmēs natryukst humora, i grupa pamatā spieļoj sev par prīcu. “Gandreiž 10nīkā” sastuovā pošu reizi dorbojās: Juoņs Kuzminskis (gitara, bolss, vuordi, muzyka), Imants Zagorskis (bass), Vitālijs Grišunovs (bungys, bolss) i Aija Kuzminska (sintezators, šeikeri). Izlasē “Odekolons” īkļautuo dzīsme “Traktoru pavieļnīks” ir par patriotisku dorbu laukūs.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu. Roksts sagataveits sadarbeibā ar bīdreibu “Latgolys Producentu Grupa”.