Apkūpuoja: Sandra Ūdre, žurnals “A12”

Izaruoda, tī ir lakoniski izteicīni, originals kinīšu dailliteraturys veids. Jimūs īsiļdejs rokstommašynu ari Jezups Laganovskis (1920–1987), kura dailradē īvārojama lūma, nasaverūt iz padūmu laiku, vysod bejuse latgaliskajam i kurs vysod sovu vuordu rakstejs Jezups.

IR TUKŠYS DĪNYS: kai izdzartys butelis; kai naizpiļdeiti sūlejumi; kai niule izroktys dūbis; kai pādejī, iz depo īmūšī tramvaji; kai atstuotys sīvys; kai skeleti dobys muzejā.

VEĻTEIGI IR: gaideit nu muļča gudru reiceibu; praseit atpakaļ pi cyta nūguojušu sīvu; streidētīs ar najāgu; ticēt narealim sūlejumim; gaustīs par paguotnis klaidom; līt iudini iz atdzysušu akmiņu, kab dabyutu tvaiku; sepinēt, kū dareitu, ka varātu atkuortuot dzeivi; gaideit pārkiuni nu skaidru dabasu; raudzeit pagrīzt atpakaļ viesturis rotu.

CEŅŠĀS SLĒPT: nūzīguma pādys; sovus tryukumus i natykumus; naatļautus mīlesteibys sakarus; patīsys dūmys par sovim prīšknīkim; sirdsapzinis traipus; plyku pakausi [suokumā].

NAĀRTAI: dūt napatīsu līceibu resp. maluot, acīs verūtīs; praseit naudu nu cylvāka, kuram jau esi poruodā; pyrmū reizi puorkuopt lauleibu; ījamūt atbiļdeigu omotu, braukt tramvajā ci kaidā cytā sabīdryskā transporta leidzeklī; nūmalnuot sovu lobuokū draugu; sajimt pateiceibu, paslaveišonu ci premeju, kas pīsaīt cytam; nest iz sātu nu dorba vītys puoruok lelus prīškmatus; naizpiļdeit sūlejumu, ka esi sajiems kukuli; vysu myužu dzert iz cytu riekina.

GRYBŪT NAGRYBŪT ŠAĻTIM DAĪT: runuot tū, kuo tu nadūmoji; atsasaceit nu pīsadaleišonys vīseibuos; maluot, kab mazynuotu sovu vaini ci raudzeitu nūveļt tū iz cytim; pacīst napareizu kritiku; atraideit skaistys sīvītis vylynuojumus; saceit golda runys; pīsadaleit nalīša gūdynuošonys svineibuos; īt pa leitu bez leitasorga.

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta leidzekļu projektā “Robežlīnijas”.