Roksta autors: Inga Čekša-Ratniece,žurnals “A12”

Itū aplīcynoj Cyblys nūvoda Blontūs. Janīna Molčanova iz sābru vaļsti dūdās videji reizi mienesī, kab pīpiļdeitu sovu mašynu, partū ka dagvīla tī vys vēļ ir lātuoka.

“Es kai peņsionare Latvejā navaru atsaļaut nūpierkt dizeļdagvīlu sovai mašynai. Ka nabyutu sūpluok Krīvejis, pa Latvejis celim es nabrauktum. Nu itenis iz sābru vaļsti piec dagvīlys brauc vysi, kam ir mašynys i pīrūbeža vizys. Daži pat kotru nedeļu. Mes jau na puordūšonai, a pošu vajadzeibom,” stuosta Blontu īdzeivuotuoja Janīna. Tīsa gon, iz rūbeža daīt gaideit ari ryndā. Sīvīte dasoka, ka tyvuok jau škārsuot Grebnevys kontrolpunktu, tok Krīvejis pusē ir moksys ceļš. Daīt škiertīs nu 600 Krīvejis rubļu aba 8 eiro. Ari pats ceļš ir drausmeigā stuovūklī, mašynai ceinūtīs ar daudzajom īdūbem. Partū jei bīžuok dūdās caur Vīntulim ci Terehovu, koč ari tī kaidu laiku ir juopavoda ryndā.

Juodasoka, ka Blonti ir apdzeivuota vīta Cyblys nūvodā. Atsarūn austrumūs nu autoceļa P49 Blontu prūda krostā. Blontu pogosts rūbežojās storp Pušmucovys, Zviergzdinis, Cyblys, Mērdzinis i Goliševys pogostim. Cīms izveiduots piec 2. pasauļa kara tūreiz Ludzys apriņča Mērdzinis pogostā. Nu 2009. gods Blontu pogosts ītylpst Cyblys nūvodā i palics par nūvoda centru.
Vaira par dzeivi Latvejis austrumu Blontūs žurnala “A12” nuokušajā numerī jau februara suokumā.

Roksts sagataveits ar Vidis regionaluos atteisteibys agenturys finansialu atbolstu nu Latvejis budžeta leidzekļu projekta “Sabiedrības un reģionu robežlīnijas žurnālā A12”.