Rokstu sagataveja: portals lakuga.lv

13. aprelī Rēzeknis Vaļsts 1.gimnazejā (Viļānu īla 2 ) nūtiks skotuvis runys konkurss “Vuolyudzāni” i vaļsts atkluotuo latgalīšu rokstu volūdys i kulturviesturis olimpiade. Itūgod obeji pasuokumi nūtiks jau 19. reizi.

Skotuvis runys konkursa „Vuolyudzāni” mierkis ir styprynuot bārnūs i jaunīšūs nacionalū identitati, veidojūt izpratni par latgalīšu autoru vuorda muokslu, latgaliski raksteita teksta vierteibu, izteiksmeibu, atteisteit školānu skotuvis runys meistareibu, emocionalitati, ceļt runys kulturu i izkūpt latgalīšu rokstu volūdu. Skotuvis runys konkursā aicynuoti pīsadaleit pyrmsškolys vacuma bārni, 1.–12. klašu školāni i ari studenti. Kotram dalinīkam juosagatavej divu daildorbu fragmentus latgaliski. Itūgod īteicamuos temys ir: es pats, saime, volūda, muns nūvods, Tāvu zeme, breiveiba.

19. atkluotuos latgalīšu rokstu volūdys i kulturviesturis olimpiadis mierkis ir školu jaunuotnis vydā popularizēt latgalīšu kulturys montuojumu, nūstyprynuot izpratni par latgalīšu rokstu volūdu kai svareigu latvyskuos identitatis daļu, rūsynuot jaunīšu interesi par latgalīšu volūdu, kulturviesturi, viesturi i veicynuot kulturys vierteibu i izcyluokūs nūvodnīku apzynuošonu školuos. Olimpiadē var pīsadaleit vyspuorizgleitojūšūs školu 10.–12. klašu komandys 3–5 školānu sastuovā.

Itūgod olimpadis aizdavumu temys ir:

• Latgalīšu rokstu volūda (rokstu volūdys prasmis);
• Annai Rancānei – 60;
• Jaunuokuo latgalīšu literatura: Raibīs “Pistacejis” (2017);
• Tulkuojumi latgalīšu volūdā: L. Kerola “Alise Breinumu zemē” (2015), A. de Sent- Ekziperī “Mozais priņcs” (2017);
• Latgolys kulturtests (latgaliskī pasuokumi, nūtykumi, jubilejis 2018. godā.

19. skotuvis runys konkursa „VUOLYUDZĀNI” nūlykums

19. atkluotuos latgalīšu rokstu volūdys i kulturviesturis olimpiadis nūlykums