Rokstu sagataveja: portals lakuga.lv

11.–13. aprelī Pleskovā (Krīveja) nūtiks kasgadejais storptautyskais dizaina festivals ar konkursa izstuodem, studentu konfereņci, mūdis skati, radūšom darbneicom, seminarim, lekcejom. Rēzeknis Tehnologeju akademejis (RTA) docātuojis Diānys Apelis vadeibā tyka izstruoduoti dizaineru dorbi plakatu konkursam i grafikys izstuodei, informej RTA Sabīdryskūs attīceibu nūdaļā.

Itūgod konkursa plakatu tema ir “Equality and Bipolarity”, puorstuovēt RTA tyka nūsyuteiti desmitem dorbu. Sovutīs storptautyskajā grafikys izstuodē “Graphics 2019” ar sovim dorbim pīsadaleis RTA profesionaluos magistra programys “Dizains” 1. kursa studeņtis Ilze Mežinska, Elva Kājiņa, Margarita Romaņčenko, programys absolventis Ina Treiliņa, Daina Dzerkale i Viktorija Loktionova, kai ari poša dizaina programu docātuoja Diāna Apele.

Kai viestej festivala organizatoru informaceja škārsteiklā, pasuokums teik reikuots nu 2014. gods i dūmuots kai radūša platforma dizaineru profesionalai izaugsmei, pīredzis apmaiņai i kontaktu veiduošonai. Ituogods vīnleidzeibys i binarūs opoziceju temu festivala pīsadaleituojim pīduovuots apdūmuot vysplašuokajuos kategorejuos – Vysuma, Pasauļa, Cylvāka pastuoviešona i atteisteiba caur Logiskū i Tālainū, Racionalū i Emocionalū, Konstruktivū i Intuitivū, Analitiskū i Sintetiskū, Verbalū i Vizualū, Formu i Saturu, Tipizaceju i Kombinatoriku, Dīnu i Nakti, Dizainu i Dzeivi.