Roksta autors: portals lakuga.lv

5. majā, atzeimejūt Boltuo goldauta svātkus, Dagdys nūvoda jaunīši dūsīs puorguojīnī. Kasgadejais maja pasuokums itūreiz veļteits Osyuna pogostā dzymušajam rakstnīkam, publicistam, Eiropys mārūga dūmuotuojam, pasaulī zynomajam parapsihologam Konstantinam Raudivei (1909–1974). Populars jis palyka ar myrušūs bolsu īrokstim magnetofona leņtēs i gruomotom par sovim eksperimentim.

Pasuokumu organizej jaunīšu bīdreiba “Ašo kompānija” sadarbeibā ar Osyuna suokumškolu, Kepovys pogosta puorvaļdi, Dagdys nūvoda Kulturys centru i Jaunīšu iniciativu centru. Par puorguojīni stuosta bīdreibys vadeituoja Olga Lukjanska: “Kotru godu majā jaunīšim ir paradzātys taida veida nūtikšonys. Tai kai K. Raudivei 110. godadīna, gribējuos Dagdys nūvoda jaunīšus īpazeistynuot ar slovonū nūvadnīku. Izzynūšū ekskurseju 11.00 stuņdēs suoksim ar pīminis ustabeņu Osyuna suokumškolā, kur Konstantins suocs sovys vuiceibu gaitys.

Beja dūma organizēt skrīšonu ar orientiešonūs. Bet na vysod saīt, kai īroksti planūs, cyuku rokumu deļ tys nav varams. Iz dzymtū sātys vītu Barinaucūs brauksim ar transportu, tod pusūtra div kilometrus īsim kuojom. Drupeit īsapazeisim ar itū vītu, īsim atpakaļ iz transportu i brauksim iz Neikšānim. Tī pi boltuo goldauta Kepovys saītu nomā puorrunuosim ar jaunīšim īspaidus i īsapazeisim ar cytim nūvoda izcyluokajim ļaudim.” Papyldu informaceja par pasuokumu, sazynūtīs ar Olgu pa mobilū telefonu 29246185.

Itūgod par K. Raudivi teik veiduota dokumentaluo filma “Izlaušanās” (scenareja autori Andis Mizišs i Bruno Aščuks, režisors A. Mizišs). Plašuoku informaceju par izcylū osyunīti ci paguojušā godā īstudātū izruodi “Raudives radio” meklejit portala lakuga.lv arhivā.