Rokstu sagataveja: portals lakuga.lv

11. majā 17:00 stuņdēs Leivuonā, Myusdīnu muokslys galerejā (Reigys īlā 108a), atkluos gleznuotuojis Sandrys Strēlis personalizstuodi “Gatavojoties ziemai”, izstuode byus apsaverama da 30. juņa, informej galerejis puorstuove Lāsma Vindule. Lelformata instalacejis “Gatavojoties ziemai” pīsagrīž myusdīnu cylvākam vys cīš soveigai gribiešonai veiduot kruojumus, koč kū kolekcionēt, neizsvarūt itūs lītu tuoluokū dereigumu. Teicīņs “gataveit kruojumus zīmai” paruoda cylvāka napuortrauktū gribiešonu i vajadzeibu piec drūšeibys, lobuokū laiku godā izmontuot, kab sasagataveitu slyktuokam laikam – zīmai. Instalacejis ilustrej vysvysaiduokūs lītu kruošonu, globuošonu, “pazušonu jamuos”, naspieju juos vysys izmontuot, lītu nūvacuošonu, aktualitatis zaudiešonu i potencialu juo pagaisšonai nabeidzamūs kastu kruovumūs. Juos izveiduošonu finansiali atbolsta Vaļsts Kulturkapitala fonds, apmekliejums – bez moksys. Galerejis dorba laiks – nu trešdīnis da svātdīnis 12:00–18:00.

Rēzeknis Tehnologeju akademejis (RTA) bibliotekā da 27. juņa apsaverama Ilzis Griezānis izstuode “Pieskarties mākoņiem”, informej RTA Sabīdryskūs attīceibu nūdaļa. Dobys radeitais breinums – muokuli – ir tik vysaidi sovuos izpausmēs. Jimūs var vērtīs caur kūku lopūtni, iudiņa atspulgā, baudūt pļovys smuordu. Muokslineicys gleznys ļaun sajust vysys dobys radeituos nūskaņu niansis.

Ludzys nūvoda pošvaļdeibys ākā (Raiņa īlā 16) jau apsaverama Jura Soikāna Ludzys muokslys školys (JSLMŠ) pedagogu, audziekņu i draugu grafikys izstuode “Tantes dillēs”, sovutīs pošā JSLMŠ 10. majā 15.00 stuņdēs Renātis Kantānis (JSLMŠ absolvente) radūšūs dorbu izstuodis “Gaisma sev” atkluošona. Izstuode byus apsaverama vysu maju. Kruoslovys Viesturis i muokslys muzejā apmaklātuoji vys vēļ var nūviertēt italīšu fotografa Luka Berti malnboltūs dorbu izstuodi “Cilvēks un daba Latvijā”. Kai golvonī objekti fotografejuos attāluoti seneji cīmati ar tradicionalom kūka sātom, vacys bazneicys i zemnīku saimisteibys.

Majā Preiļūs (A. Upīša īlā 20) dorbu suokuse “Moto & Metal NESTER CUSTOM” muokslys galereja. Poša galereja, motocykli i skulpturys, kas te izstuodeitys, ir galerejis saiminīka Aleksandra Nestjeruka radūšuo dorba rezultats. Vysu galerejis interjeru izveiduoja Aleksandra radūšuo komanda no “NESTER CUSTOM visual service”. Preiļi kļūst daudzveidīgāki un spēj piedāvāt izklaides un baudījumu ikviena interesēm. Eipaši var prīcuotīs veirīši, kam tyva motocyklu, vieja, dreizuma, remonta i eļļainu rūku tema. Bet na viņ! Sīvītis byus puorsteigtys par izsmalcynuoteibu i izdūmu dizaina prīškmatu radeišonā, bet bārni byus sajiusmā par metala muokslys dorbim nu multfilmu temys. Muokslinīcyski izvītuotys izstuožu zalis ar individualizātim motocyklim i metala muokslys skulpturom dūmuotys kai izklaidis komplekss sevkuram – lelam i mozam.

Daugovpiļs Marka Rotko muokslys centrā 8. Storptautyskais Latgolys grafikys simpozejs nūsaslēgs ar daleibnīku dorbu izstuodis atkluošonu18. majā 16.00 stuņdēs.