Rokstu sagataveja: portals lakuga.lv

9. junī  Baļtinovys muižys parka estradē aicynoj Latgolys regiona izgleiteibys īstuožu pyutieju orkestru festivals “Taures skan Baltinavā!”. Festivals, kurs itūgod notiks jau trešū reizi, veļteits Latvejis armejis symtgadei, informej festivala vadeituoja Marija Bukša.

Festivala golvonuo nūtikšona byus orkestru lelkoncerts 15.00 stuņdēs, kurymā pīsadaleis jaunīši nu septeņu Latgolys izgleiteibys īstuožu orkestru – Bolvu Muzykys  školys orkestris, Baļtinovys Muzykys i muokslys školys orkestris, Kuorsovys Muzykys i muokslys školys orkestris, Rēzeknis 5. vydsškolys orkestris, Rēzeknis 6. vydsškolys orkestris, Preiļu nūvoda jaunīšu orkestris, Naujinis Muzykys i muokslys školys orkestris, kai ari festivala eipašais gosts – Zemissardzis orkestra bigbends kapteiņa Anda Kareļa vadeibā.

Koncertu vadeis Kozmens, bet vysys dīnys garumā apmaklātuojus prīcēs ari Vaļsts rūbežsardzis Viļakys puorvaļdis tehnikys izruodeišona i dīnests suņu paraugdemonstriejumi, Latgolys retro automobiļu izstuode, sātys ražuotuoju tierdzeņš i meikstuos atrakcejis bārnim. Sadarbeibā ar Zemissardzis 2. Vydzemis brigadis 31. kuojinīku bataljonu byus vareiba apsavērt karaveira ekipiejumu i izzynuot par vareibom dīnēt Zemissardzē.

“Laikā, kod bārnim teik pīduovuotys tik daudzys izklaidis, festivala organiziešona ar mierki saglobuot i popularizēt pyutieju orkestru muziciešonys tradiceju ir byutiski.  Bārni na viņ izkūp sovus muzykalūs talantus i paruoda jūs apleicejim, bet ari teik īsaisteiti myusu viesturis izzynuošonā i populariziešonā, partū ka itūs pasuokumus veidojam, bolstūtīs kaidā byutyskā temā. Itūgod izalasejom festivalu veļteit Latvejis armejis symtgadei, atcerūtīs karaveiru drūsmi cauri laikim, kai ari myusu dīnu Nacionalūs bruņuotūs spāku karaveiru, zemissorgu, sevkura īdzeivuotuoja gataveibu aizstuovēt myusu vaļsti. Orkestra skanis i marši ir bejuši sūpluok karaveiru sūlim vysūs laikūs, partū gribim aktualizēt itū tematu, atguodynuot jaunīšim tū, ka orkestra nūzeime i prasmu izmontuošona plešās tuoļuok par bārnu muzykys školys telpom,” soka festivala vadeituoja i iniciatore, Baļtinovys Muzykys i muokslys školys direktore Marija Bukša.

Pasuokumu atbolsta Latgolys atteisteibys agentura, Baļtinovys nūvoda dūme, Latvejis vaļsts meži, Latgolys Retro Auto Moto Klubs, Vaļsts Kulturkapitala fonds, Latvejis Republikys Zemissardze, Vaļsts rūbežsardzis Viļakys puorvaļde.