Rokstu sagataveja: portals lakuga.lv

26. junī 19.30 stuņdēs kanalā “Re:TV” varēs nūsavērt cykla “Latgolys pīrūbeža – vīta, kur suocās Eiropys Savīneiba!”pyrmū raidejumu. Jaunais raidejumu cyklys ir par kasdīnu i nūteikūšū pīrūbežā, kai ari īdzeivuotuoju spiejom i zynuošonom kritiski vērtēt medeju saturu, par medeju daīmameibu attuoluokajūs vaļsts nūvodūs i specialistu vīdūkli par tū, informej projekta vadeituoja, LRT žurnalisteAusma Sprukte.

Da nuokušuo goda janvara beigu Latgolys Regionaluo televizeja veiduos desmit raidejumus, kuru laikā žurnalistis A. Sprukte, Beatrise Jakobsone i Svetlana Dudarenoka dūsīs iz Latvejis–Krīvejis i Latvejis–Boltkrīvejis pīrūbežu. Tī juos tiksīs ar Daugovpiļs, Kruoslovys, Dagdys, Zylupis, Ludzys, Ciblys, Kuorsovys, Baļtinovys i Viļakys nūvodu īdzeivuotuojim, pošvaļdeibu vadeituojim, cytim žurnalistim, kab puorrunuotu suopeiguokūs vaicuojumus, kas saisteiti ar medeju telpu, izzynuotu medeju lītuošonys īrodumus, gon ari kūpā piļdeitu aizdavumus i ar jūs paleidzeibu vuiceitūs kritiski vērtēt informaceju. Nūslādzūšajā raidejumā byus uzrunuoti augstuokūs izgleiteibys īstuožu, NEPLP, ministreju kai ari cytu instituceju specialisti, kab rostu risynuojumus situacejis uzlobuošonai.

Pyrmajā raidejumā Kulturys ministrejis Medeju politikys nūdalis puorstuove Klinta Ločmele īskicēs, kas ir medeju kritika i medeju prateiba, cik atteisteitys juos ir Latvejā, sovpus žurnaliste A. Sprukte tiksīs i piļdeis aizdavumus ar Baļtinovys nūvoda īdzeivuotuojim.

Pyrmais cykla “Latgolys pīrūbeža – vīta, kur suocās Eiropys Savīneiba!” raidejums jau 26. junī 19.30 stuņdēs kanalā “Re:TV” ar atkuortuojumim catūrtdiņ 10.30 stuņdēs, pīktdiņ 12.00 i sasdīnis reitā 8.00, kai ari kanalā “RīgaTV 24” 27. junī14.30 stuņdēs. Dīnu vāluok raidejumu varēs atrast ari škārsteikla lopā www.lrtv.lv, LRT socialū teiklu kontūs www.facebook.com, www.youtube.com, kai ari platformā xtv.lv.

Latgolys Regionaluo televizeja raidejumu izveidei dabuojuse atbolstu programā “Atbolsts medejim sabīdryski nūzeimeiga satura veiduošonai i nacuonaluos kulturtelpys styprynuošonai latvīšu volūdā”. Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Latgolys pīrūbeža – vīta, kur suocās Eiropys Savīneiba!” saturu atbiļd SIA “Latgolys Regionaluo televizeja”. 

Raidejumu cykla reklamkadrus var nūsavērt ite.