Rokstu sagataveja: portals lakuga.lv

Vosorys pylnbrīdā, 19.–20. julī, Preiļūs, IV Latgolys stuostnīku festivalā “Omotu stuosti” iz sasatikšonu aicynoj stuostnīkus nu vysu Latvejis nūvodu, kai ari amatnīkus i tradicionaluos kulturys mīļuotuojus. Dasasaceišona da 28. juņa, itūgod Latgolys festivalā gūdā teik calta kūka amatnīceiba – eipaši pinieju omots, informej festivala koordinatore, Preiļu Golvonuos bibliotekys Bārnu literaturys nūdalis vadeituoja Vilhelmīne Jakimova.

Vīns nu Latgolys festivala aizdavumu ir veiduot atpazeistamu iradūšu platformu Latgolys amatnīceibys izzynuošonai ipopulariziešonai. Īprīškejūs godūs īpazeits pūdnīka, kuozu saimineicys i bitinīka omots. Ituo gods tema veļteita kliudzeņu piniejim, partū itūreiz stuosteisim par itū omotu, juo pratiejim, byus vareiba vāruot, kai nūteik peišonys process ipuorsalīcynuot, kū spiej radeit myusu rūkys.

Pyrmuo festivala dīna tiks atkluota Preiļu Golvonajā bibliotekā ar eisū īsasiļdeišonys stuostu riņči, tod vysi dūsīs iz kliudzeņu pinieja Jura Gavara dzymtys sātu Vuorkovys nūvoda “Mežlokos”, kur, dorbuodamīs juo vadeitajā peišonys meistardarbneicā, varēs klauseitīs omota nūslāpumu stuostus. Turpynuojumā Rībeņu vydsškolys školuotuoja Rita Pudāne izstuosteis nūvodpietnīceibys i stuostnīceibys saskarsmis veiksmis stuostu, kuo rezultatā tyka izveiduotys tradiceju būrtneicys “Riebiņu novada stāsti”, bet vokorā sevkursinteresents aicynuots iz “Stāstu groziņvakaru” ar Jāņa Eglīša Preiļu Vaļsts ģimnazejis folklorys kūpu “Rūtoj”.

Festivala ūtruos dīnys aktivitatis rysynuosīs Rībeņu nūvodā. Mozajim klauseituojim byus vareiba pīsadaleit Bārnu reitā “Stuostu rypuļs”, ko vadeis Inguna Radziņa i Vilhelmīne Jakimova, bet lelajim stuostnīkim tymā laikā nūtiks M. Mellēnys i G. Pakalna vadeituo treneņnūdarbeiba. 

Festivala eipašais gosts – Rēzeknis Tehnologeju akademejisstudeju i zynuotņu prorektore Angelika Juško-Štekele ar lekceju “Laimes meklējumi latgaliešu pasakās”, i festivala nūslāgumā – padomu dūšonys piecpušdīne “Jaunim devu suoļ ar maizi, vacim – jauku volūdeņ” ar folklorys kūpu “Jumalāni”.

Iz festivalu teik aicynuoti vysu Latvejis kulturviesturiskūs nūvodu stuostnīki, UNESCO Latvejis Nacionaluos komisejis teikla “Stāstu bibliotēku” puorstuovi, tradicionaluos kulturys meiļuotuoji, kai ari vītejuos folklorys kūpys, stuostnīku kusteibys atbaļsteituoji i interesenti. Iz festivala atkluotajim pasuokumim aicynuots sevkurs i jī ir bez moksys.

Festivala projektu finansiali atbolsta VKKF, Preiļu, Vuorkovys iRībeņu nūvoda pošvaļdeiba i vītejī uzjiemieji.

Sekmeigai festivala nūtikšonai vajadzeiga individuala daleibnīku dasasaceišona. Seikuoka informaceja par festivalu, rokstūt iz e-postu jakimovavilhelmine@gmail.com ci zvonūt 29495394 Vilhelmīnei Jakimovai.

Dasasaceišonys anketa i festivala programa.