Rokstu sagataveja: portals lakuga.lv

Soka, ka bārnus gryuši dajiucēt pi latgaliskuo. Meldrys Gailānis raksteišona latgaliski īdvasmuojuse junuokū atvasi tū dareit leidza. Irbei ir viņ seši godi, a jei muok par sovu bārna pasauli izstuosteit latgaliski i vēļ dzejā. Ar sovom ailem jei ir pīsadalejuse div radūšūs konkursūs (1. vīta Bieržgaļa pogosta konkursā “Latvija, es esmu Tavs bērns”, pateiceiba O. Slišāna radūšūs dorbu konkursā “Vuss apleik maņ munā volūdā skaņ”) i skotivis runys konkursā “Vuolūdzāni”.

Meldra Gailāne

&&&
taids
puorsamejs ar vosoru
pavasars
vīnā laikā sazīdiejušys
žybactenis i pīninis
leits nav bejs jau kaidu šaļti
vysys stidzenis da teve
seiku boltu zīdeņu puorkluotys
uobeļneicys vēļ pumpurūs

&&&
vierbu vierbu
savierbu veseleibu
slimeiba uorā
spāks kaulūs īškā
opols kai uobuļs
seivs kai rutkys
vierbineica
nedeļa da leldīnis
klusuo
vydabolsa izmekliešona
ci ari itymā godā
dasišsu krystā
Jezu…

&&&
īdedz guni sovā lūgā
ceļš da teve cīši tymss
pa malnim mežim blūdejūs
vylkam viersā naizskrīt
nūej da upis nu reita
kab ocu izskoluot
dīnā tik daudzi juosaredz
kab nanūsablūdeit
tu muns vylka bārns
tu muns luocs
kas tev mīgu viļks
kas sapynā īleiguos

&&&
atbrida vokors zamainom kuojom
pīsāda iz gultys molys
paskaiti maņ puosaceņu
par princesem i prinčim
i rogonom brīsmeigom
dzīsmeiti nūdzīdi
es tovā ozutē aizmigšu
bierneņš soldoni gulēja

&&&
panaceja pret bezmīgu
tovs bolss telefonā
kai Tora* vasars
Pakuortais** sirdeigs
skaita vuškys
vīnys datryukst

&&&
kukužu smuords
kai nazkod
seņ nacaltūs dečūs
i dzeļtēt suokušūs pologūs
Dīvmuotis abrazeņš
Agatys maizeite
pyrmais pārkiuņs byus dreiž
i Leldīne byus
īmeisim seipulu čauluos
kruosuotys ūlys
i leigačys skrīs augstu
viņ leiguotuojam
cymdu puora nabyus
vysus pārnejā godā izdaleju
es izgaļdeišu tū pasoli
i seipulus atsīšu
samierkšu iudinī
byus myusim grādys
i itymā godā
viņ tovys dzīsmeitis nabyus
vacmāmeņ…

&&&
itī kreiteni nakruosoj laimeigū nuokūtni
jiurā bāgums i klīdz kaivys
glīmežneicys atvārtys
itī zeimuli nazeimej laimeigū nuokūtni
kolnu puorejuos snīgā
sorkonys mogonys zīd

&&&
dzaltons
sorkons
zaļš
šaļtim
gar ocu
īkrist vīnā lopu koponā
ūtrā
trešā
justīs kai dzikam kačam
napaseitynuots viejs
dzonoj pādejuos nūcejis
par garuoku vosoru

&&&
tev, muns kačeit!

tu muns soldonums
rudiņa reitūs i leitūs
tu muns mīrynuojums
vokora dzastrumā
muns syltais čiteņš
pi kura pīsaglaust
sevi i pasauli just
murdzīsmeitē klausūtīs

&&&
dzaltonū šlivu i uobuļu laiks
vokora dzastrums nakaitej
mauduotīs naktīs
tovi sapyni par mani
izgaist nu reitu
putyna spolvys kuknē
kača pateiceiba
par pīradynuošonu
vysys parolis damierstys
socteiklu dzeive nūteik
realitatē

Irbe Bārbala Kārkliņa

☼☼☼
muni draudzeni pogolma vydā
sasāduši ryndā kai strazdeni
jī rūtaļuos naīt, stuostus nastuosta
jī mani izīmam uorā gaida
a maņ – mīdzeņš vēl īt
a maņ – gulēt gribīs
a maņ – mute namozguota
i sukne nazkur pazuduse
i brūkaškys naāstys
i ustoba naslauceita
aizskrīn muni draudzeni
kai strazdeni iz pogolmu cytu

☼☼☼
zvaigzneitis dabasūs tik spūži mirdz
mienesteņš pīmīdz ar aci maņ
mes īmam ar mamu iz sātu i veramēs
kai zvaigzneitis dabasūs ar mienesi doncoj
es pajimšu sedzeņu i uorā atsaguļšu
vāruošu zvaigzneitis i dūmuošu
kai aizliduot kosmosā
grybu ar zvaigzneitem doncuot vysu nakti

☼☼☼
īt Laimeņa pa prīšku
es juos piedeņuos īšu
mameņu samīļuošu
tieteņu gaideišu
i mes vosorā skrīsim
zemineitis laseisim
vysi kūpā byusim
laimeigi

☼☼☼
vyss apleik maņ munā volūdā skaņ
nu reita mameņa lobreitu teic
uorā sauleite sylti sveic
biteitis munā volūdā saņ
i iz strūpu madu nas maņ
putneni čyvynoj kūku zorūs
maņ dzīsmeiti volūdā munā
es volūdā sovā īauguse
kai pučeite duorzeņā

*Tors – pārkiuņa i augleibys dīvs senejūs skandinavu mitologejā.
** Pakuortais – augstuokuo dīva Odina aprokstūšs tāls senejūs skandinavu mitologejā.