Rokstu sagataveja: portals lakuga.lv

20. julī Kruoslovys piļsātys svātkūs “Nogaršo Latviju Latgalē!” nūsaslēgs Latvejis Lauku konsultaceju i izgleiteibys centra (LLKC) reikuotī Nūvoda garšys pasuokumi regionūs, informej LLKC Sabīdryskūs attīceibu nūdalis vadeituoja Ilze Rūtenberga-Bērziņa.

Piļs pogolmā vysys dīnys garumā varēs na viņ degustēt i īsaguoduot vysaidus muojražuotuoju i mozūs ražuotuoju produktus, bet ari īpazeit šefpavuoru Māra Astiča i Haralda Sauša Latgolys garšu. Sevkurs varēs izagleituot četruos meistarklasēs par tū, kai sātā sataiseit sīru, latgaļu asuškys i sakuļt vysaidus kokteiļus. Byus ari Mozūs pavuoru škola i pavuorzeļļu saceņseibys. Kruoslovā varēs īpazeit ari ES Kulinaruo montuojuma teikla daleibnīku pīduovuojumu nu Boltkrīvejis.

Muojražuotuoju i mozūs ražuotuoju leidzdaleiba sūlīs byut gona plaša – dasasacejuši vairuok par 30 daleibnīku. Varēs baudeit olu i sīru, gardynuotīs ar madu i saļdejumu, ļautīs bīdreibys “Latgolys golds” vadeituoja Andra Meijera aizrauteigajam stuostam par speķa nūzeimi myusu iedīņkartē, tikt pi daudzu jau īpazeituos “Obelisk Farm” kaņepu produkcejis, raudzeit piec seņču metodem kūka traukūs dareitu olu, īpazeit plašū gryudaugu pīduovuojumu nu z/s “Kotiņi” i atkluot vēļ daudzys cytys Latgolys nūvoda garšys.

Pasuokums “Novada garša” itūgod gasteis ari Valmīrā, Siguldā, pi Nabys azara Kuldeigys pusē i Ribbis patmalēs Ceraukstis pogostā. Piec Latgolys pasuokuma vysi mozī ražuotuoji i muojražuotuoji, kurus par lobuokajim pīzynuši pasuokumu apmaklātuoji kotrā nūvodā, 27.–28. septembrī dūsīs iz Reigu, kab pīsadaleit “Novada garšas” nūslāguma pasuokumā Hanzys peronā.

Mārtiņš Cimermanis, LLKC vaļdis prīšksādātuojs: “Ir miļzeigs gondarejums par pošvaļdeibu i uzjiemieju atsauceibu, veidojūt “Novada garšas” pasuokumus regionūs. Juopīzeist, ka jūs eistynuošona izadeve lobuok nakai ceriejom. Mums teišom izadeve atkluot i paruodeit, cik daudz kulinarūs boguoteibu ir myusu nūvodūs. Pasuokumā Reigā par tū varēs puorsalīcynuot ari golvyspiļsātys īdzeivuotuoji. Pituo – taišni Hanzys peronā mes atkluosim, kurs ražuotuojs vysaiduos kategorejuos piec apmaklātuoju dūmom bejs vyslobuokais. Apkūpojūt školu povuoru veikumu, mes turpynuosim nūpītni analizēt ari tū, kai školānu dīniškys vairuok veiduot nu vītejūs produktu, kai padareit jūs teikamuokus bārnim.”
LLKC reikuotuo “Novadu garša” itūgod nūsaslēgs ar pasuokumu “Nogaršo Latviju Rīgā!” 27.–28. septembrī Hanzys peronā.