Rokstu sagataveja: portals lakuga.lv

3. augustā 19. stuņdēs Viļakys estradē nūtiks Viļakys nūvoda autoru dzīšmu koncerts “Mūsu dziesma”. Pasuokuma golvonais mierkis ir apzynuot i paruodeit tuos vierteibys, kū sovam nūvodam ir davuši Viļakys pusis muzykys cylvāki, kai ari radeit skaistus svātkus Viļakys īdzeivuotuojim i gostim, informej Māris Lāpāns.

Sevkurā nūvodā, naatkareigi nu dorbuošonuos jūmys, ir cylvāki, ar kurim var lapnuotīs. Vīni nu taidu cylvāku ir tī, kam doba ir davuse spieju i talantu radeit sovu muzyku, dzeju ci dzīsmis. Dažu dorbi i pazeistami plašuokam klauseituoju lūkam, cytu – mozuokam, bet tūmār piļneigi vysi itī cylvāki ir ar plašu īškejū pasauli. Tuo navar nanūviertēt.

Ari Viļakys nūvodā ir taidi autori, nu kurūs daži jau vaira nav myusu vydā, bet daudzi vys dorbojās. Da ituo nav apkūpuots itūs cylvāku davums sabīdreibai, partū roduos ideja izveiduot koncertprogramu nu tūs autoru dorbu, kas dzeivoj Viļakys nūvodā ci ari jūs saknis ir nu juo. Tī ir Sandra Mežore, Inese Smirnova, Vilis Cibulis, Jānis Sprukulis, Raimonds Logins, Ēriks Matisons, Aivars Lapšāns, Arnis Bukšs , Madara Mieriņa, Normunds Orlovs, kai ari myužeibā aizguojušī Ilgvars Čigurovs i Ainis Šaicāns.

Koncertā skanūšūs dzīšmu izpiļdeituoji daleji byus i poši autori, i ari cyti solisti. Kūpumā iz skotivis kuops 15 izpiļdeituoji – duets Inga i Normunds, Aivars Lapšāns, Dagmāra Laicāne, Vilis Cibulis, Anna Maksimova, Ramona Romanova, Raivita Raginska, Normunds Orlovs, Ingrīda Šaicāne, Sanda Kļaviņa, Māris Lāpāns, Aldis Prancāns, grupys “Muiža”, “Unknow artist”, “Napruots”. Pavadejumu solistim nūdrūsynuos muzykaluos apvīneibys “Ainis” muzyki. Piec koncerta 22.00–03.00 stuņdēs sekuos ari zaļumballe kūpā ar grupom “Muiža”, “Unknow artist”. Eipašais nakts gosts – Normunds Rutulis. Storplaikūs DJ Ingars.

Beletus iz vokora koncertu i zaļumballi var īsaguoduot bilesuparadize.lv, kai ari Viļakys kulturys nomā i Bolvu Kulturys i Atpyutys centrā. Beletu cena īprīkšpuordūšonā: koncerts – 4 eiro, zaļumballe – 4 eiro, pierkūt iz obejim kūpā 6 eiro. Beletu cena iz vītys nūtikšonys dīnā sevkuram pasuokumam 6 eiro.