Roksta autors: portals lakuga.lv

Latgolys Kulturys centra izdevnīceibā izdūta kulturviesturiska i literara godagruomotys “Tāvu zemes kalendars 2020” 30. (81.) guojums, portalu lakuga.lv informēja LKC izdevnīceibā.

Kalendarā atrūnami roksti par lauksaimisteibys, medicinys, arheologejis, viesturis, kulturviesturis, volūdys vaicuojumim, kai ari literatura, kritika i publicistika. Kai īrosts, sovys atminis par saimis viesturi publicej Latgolys īvārojamuokūs dzymtu puorstuovi, godagruomota pīmiņ ari īprīkšejuo goda aizguojiejus.

Itūreiz poši interesantuokī redzīs Latgolys viesturei veļteitī roksti, izceļt grybātūs: pīcus arheologa Jura Urtāna rokstus – par Atašīnis i Žeiguru Katlešu piļskolnim, par Zylupis nūvoda Zalesjis pogosta Pamplevys i Kaunatys Mozgu kopsātu akminim, par nūtikšonom Krustpiļs Dzierkaļu piļskolnā; Valentina Edmunda Klešnika arhiva pietejumu „Arhiva dokumenti par Ludzas viesturi”. Sovūs redzīņūs par volūdu dalejušīs Jūlijs Trōps i Pīters Turkopuls.

Literaturys, kritikys, publicistikys daļā skaiteituojim jau pazeistami autori, kai Jūlijs Trōps, Lidija Agloniete, Leonards Rakickis, Ilze Keiša, Ernests Vilcāns, Voldemārs Voguls, Maruta Avramčenko, Rūdolfs Linužs, Magdalena Vjatere, Romons Spaitāns, Pīters Meikstums, i jauni vuordi, kai Imants Zeltiņš, Konstantins Koguts. Kulturviesturis pīminekļu rubrikā pīduovuoti fragmenti nu Konstancis Benislavskys (1747–1806) dzejūļu gruomotys „Sev dzīduotys dzīsmis” ar K. Lejnieka aprokstu (1937). Kai vysod, drupeite muokslys – vyda vuokūs Modesta Līpenīša gleznys, viņ žēļ, ka nivīna nav tykuse iz uorejuo vuoka.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.