“Upītes Uobeļduorzu” vadeis Juoņs Skuteļs
Rokstu sagataveja: portals lakuga.lv
21. septembrī jau ostoņpadsmitū reizi, svietejūt simbolisku pylngadeibu, Viļakas nūvoda Upītē nūtiks vacuokais latgalīšu muzykas i aiļu festivals “Upītes Uobeļduorzs”, kuru itūgod vadeis komikis Juoņs Skuteļs. Tymā pīsadaleis kai latgalīšu muziki, tai literati – “Dabasu Durovys”, “Unknown Artist”, “Trešīs Ņutona lykums”, “Žvūrgzdyni”, Ilze Sperga, Anna Rancāne, Ligija Purinaša i cyti. Ituo goda festivala eipašais gosts byus grupa “Linga”.
“Upītes Uobeļduorzs” ir vīneigais festivals, kurš namaineigi kotru godu puļcej latgalīšu literatus i muziķus, īpazeistynojūt kai ar jaunim vuordim latgalīšu kulturā, tai aicynojūt latgalīšu muzyku i literaturu atkluot kotram interesentam. Naiztryukstūša festivala tradiceja ir ari kaids eipašais gosts – festivalā uzastuojs gon Renārs Kaupers, gon aktrise Zane Jančevska, gon dzīsminīks Kārlis Kazāks, grupys “Inokentijs Mārpls”, “Gain Fast” i cyti gosti. Itūgod festivala vadeišona uzticāta komikim Juoņam Skuteļam, kurs pats ari īt nu Latgolas, bet eipašūs gostu gūdā itūreiz byus grupa “Linga”.
Pylngadeibys festivalā “Upītes Uobeļduorzs” 21. septembrī itūreiz uzastuos muziki i grupas: “Dabasu Durovys”, folkloras kūpa “Upīte”, “Gandreiž 10nīkā”, “Trešīs Ņutona lykums”, Vinsents Kūkojs, “Unknown Artist”, “Kei-Rei”, “Žvūrgzdyni”, Rihards Krilovs, Saļņovas kapela i Santa Savicka-Drozdova, bet literari prīcēs Mārīte Slišāne, Ligija Purinaša, Karonhisake, Mārīte Bikovska, Ilze Sperga, Ineta Atpile-Jugane, Līvija Liepdruviete, Anna Rancāne i Dagneja.
Meilas aiļu i dzīšmu festivala “Upītes Uobeļduorzs” aizsuokums meklejams 2002. godā, i tys ir vacuokais da ituo nūteikūšais latgalīšu festivals pasaulī. Pasuokuma idejas autors ir latgalīšu literats, nūvodpietnīks Ontons Slišāns, kurš sovulaik īsadūmuoja sataiseit sovpateigu dzejas dīnom veļteitu festivalu, kab popularizātu i saglobuotu latgalīšu volūdu. Pošu reizi festivala organiziešonu turpynoj Ontona dāls Andris Slišāns ar saimi, saglobojūt festivalu kai kasgadeju latgalīšu sasatikšonas reizi, kurā skaņ latgalīšu volūda. Pyrma diveju godu topa ari jauna festivala “Upītes Uobeļduorzs” himnas verseja, kuras īrokstā pīsadaleja vairuoki Latvejā populari muziki – Māra Upmane-Holšteine, Renārs Kaupers, Kaspars Zlidnis, Guntis Rasims, Kristaps Rasims, Guntra Kuzmina-Jukna i Arņs Slobožanins.
Atsaverūt iz aizvadeitajim niu jau ostoņpadsmit festivala godim, “Upītes Uobeļduorzs” reikuotuojs Andris Slišāns soka: “Verūtīs iz “Upītes Uobeļduorza” 18 godim, ir paspiejuse izaugt paaudze, kas cytuoži navar īsadūmuot septembri bez festivala, bez dzejas i dzīsmem latgaliski. Prīcej, ka dzejnīka Ontona Slišāna izsapņuotais sapyns ir dzeivs, aug lyls i šūgod palīk “pīaudzs”. Kotru godu kuods breinums nūteik i mest tū breinumu rodam.”
Festivala īejis beleti byus nūpārkami iz vītas pyrma nūtikšonas 21. septembrī, suokums 19.00. Beletu cena nu 18.40 leidz 19.00 byus 3,00 €, bet piečuok 5,00 €. “Upītes Uobeļduorzs” reikuotuojs ir Namaterialuos kulturas montuojuma centrs “Upīte”.
Festivala nūtikšonu atbolsta Vaļsts kulturkapitala fonds, Viļakas nūvoda dūme, ZS “Kotiņi”, SIA “Dolo”, SIA “Advors”, Zīmeļlatgolas laikroksts “Vaduguns”, latgalīšu kulturas ziņu portals lakuga.lv i “Anneles zeme”.
Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.
