Intervejis autore: Vineta Vilcāne, portals lakuga.lv

Par latvīšu cītūksni Amerikys Savīnuotajuos Vaļstīs var saukt Hjūstonu. Tī ap sevi latgalīšus i puorejūs latvīšus puļcej uzjiemiejs, latgalīšu finantrops i Latvejis gūda konsuls Teksasys štatā PĪTERS ALOIZS RAGAUŠS. Jis aktivi pīsagrīzs sovys dzymtys viesturis izpietei, i itušaļt vīna nu juo dzeivis miseju ir atbaļsteit latgaliskū kulturu. Oktobra suokumā Pīters gasteja Latvejā, kur paraleli dorba dzelom, atroda laiku sarunai par latvyskuma i latgaliskuma nūzeimi juo dzeivē.

Latvejā ir labi zynoms eksprezidenta Valda Zatlera izteicīņs “Kas es asmu?”. Kū tu sev atbiļdietim iz itū vaicuojumu?

Itū vaicuojumu var aizdūt ari cytaižuok – kas ir tova identitate? Muna identitate ir vysu munu dzeivis, kai biznesa, izgleiteibys i cytu, pīredžu apkūpuojums. Muna identitate sastuov nu dažaidu faktoru, vīns nu tūs, prūtams, ir latvīša faktors. Es asmu ari divu bārnu tāvs, veirs, katuoļs, latgalīts i amerikaņs, ari uzjiemiejs. Ari Latvejis gūda konsuls Teksasā.

Iz itū vaicuojumu var byut dažaidys atbiļdis. Kotrys mes sastuovam nu dažaidu fragmentu, ari es. Atkareigs nu tuo, kaidā dzeivis pūsmā tu esi. Es raugu byut aktivs i atbaļsteit, veicynuot projektus dažaiduos jūmuos. ASV es atbolstu Mičiganys universitati i teatri Hjūstonā, ituos dīnys asūt Latvejā, vaira laika veļteju latgalīšu dzelom. Īsasaistu maņ svareiguos aktivitatēs. Vysleluokū prīcu itymā dzeivis pūsmā roda ar Latveju i latvyskū saisteitī projekti.

Latvyskajā i latgaliskajā kulturā tu esi vaira aktivs pādejūs godus. Kod i parkū roduos tova interese?

Es vysod asmu bejs cīši īinteresāts Latvejā. Kod es augu, mes ar saimi guojom iz latvīšu katuoļu bazneicu, muna muote i saime beja cīši aktiva. Zīmyssvātkim, Leldīnei i Juonim vysod beja lela nūzeime.

2014. goda Leldīnē pi mane cīmā beja muns onkuļs Pīters, jis nupat beja atsagrīzs nu Latvejis. Pi vakareņu golda jis suoce stuosteit par sovu braucīni. Jam beja leidza gruomota par Andryvu Jūrdžu, kurymā beja ari juo tāva, muna vacuotāva roksti.

Palaižu apleik gruomotu i vaicuoju, voi kaids nu kluotasūšūs var iztulkuot, jo roksti beja latgaliski. Nivīns navarēja puorskaiteit, kū muns vacaistāvs beja pīrakstejs. Tys mani cīši ispaiduoja, šokēja, ka bārni navar puorskaiteit, kū pīrakstejs jūs tāvs. Tys mani suoce uztraukt, es suoču vaira interesētīs par saimis viesturi.

Tiuleit piec tikšonuos es suoču internetā meklēt par Jūrdžim, Cybuļskim i Ragaušim. Atrodu vysaidus rokstus, uzguoju ari filmu “Myužeigais kalinders” par Andryvu Jūrdžu i juo radinīkim. Filmu vierūs daudzys reizis, redzieju sovus radinīkus, kurus nikod nabeju satics. Beju fascināts par vysu latvyskū, par latgalīšu volūdu i juos problemom. Es klivu apsāsts ar itū vysu. Tyss vyss ir kai lela snīga bumba, kas veļās i palīk leluoka.

Tu esi finansiejs ci leidzfinansiejs daudzys kulturys aktivitatis, pīmāram, dokumentalū filmu “Likteņzeme”, jaunuokū latgalīšu filmu “Piļsāta pi upis”, muzykys albumu “Dvieselis steigys”, vairuoku gruomotu izdūšonu. Iz Latvejis symtgadi ar tovu atbolstu Niagarys iudiņa krytyms tyka izgaismuots Latvejis korūga kruosuos. Es nanūsauču vysus. Parkū tu tū dori?

Tuos vysys ir atškireigys aktivitatis. Es atbolstu projektus, kas cytaiž natyktu eistynuoti. Mani fascinej latgalīšu volūdys vaicuojums i latgaliskuo kultura. Es grybu atbaļsteit ar Latgolu saisteitus pozitivus projektus. Gruomotu publiciešona paleidz saglobuot volūdu, gruomotu tulkuojumi iz angļu volūdu paleidz Amerikys latgalīšim saprast konceptus i kulturu, kuru jī cytaiž nikod navarātu saprast. Ar filmom ir tys pats. Es dūmoju, ka tys ir svareigi kulturys populariziešonai i paruodeišonai pozitivā i izklaidejūšā veidā. Svareigi ir ar itom akvititatem īinteresēt jaunīšus.

Vairuoki projekti ir saisteiti ar saimis viesturi, kas tīšā veidā ir saisteita ar latgalīšu volūdu. Muna vacuotāva vacaitāvs beja Andryvs Jūrdžs, Juoņs Cybuļskis, kuram kūpā ar Vladislavu Luoci beja pyrmuo latgalīšu izdevnīceiba, beja muna vacuotāva bruoļs. Maņ ir sajiuta, ka es turpynoju jūs dorbu.

Kurs nu vysu latviskūs i latgaliskūs projektu, kurūs esi pīsadalejs, tev ir vystyvuokais, eipašuokais?

Filmu projekti ir vystyvuokī, jo tymūs ir īlykts vysvaira pyuļu, laika. Gola rezultats ir izklaidejušs i tys pīsaista dažaidys auditorejis. Izruodūt filmu var redzēt cylvāku reakcejis – pozitivys i nagativys.

Vīna nu filmu ir “Likteņzeme”, vairuokom filmom asmu pīsadalejs subtitru tulkuojumūs iz angļu volūdu. Niu taisom subtitrus angļu volūdā deļ Arņa Slobožanina filmys “Latgalīši Sibirī”. Tamā radzama ari muna muoseica, kas dzeivoj Sibirī. Publicejam ari gruomotys, kas prosa laiku i ari profesionalitati, bet tuos napīsaista tik lelu auditoreju kai filmys.

Kas tevi īdvasmoj?

Jebkas, kas ir saisteits ar latgaliskū i latvyskū mani īdvesmoj. Vysvaira īdvesmoj cylvāki, kas dora kai breivpruoteigī, kas zīdoj sovu laiku dažaidu ideju eistynuošonai, īskaitūt munus senčus. Cylvāki, kas mūstās ar dūmu, kaidu īguļdejumu es varātu dūt.

Latgalīšu nasavteigū dorbu es redzieju jau bierneibā, muns vacaistāvs beja daļa nu trimdinīku kusteibys, kas sovu dzeivi veļteja latgaliskajam, iguldūt gon sovu laiku, gon naudu. Tys beja fascinejūši. Jī sevi veļteja tam vysam, tei beja jūs identitate, kultura.

Jau kaidu laiku tu esi Latvejis gūda konsuls Teksasys štatā. Kaidi ir tovi pīnuokumi?

Byušona par gūda konsulu ari dūd daudz prīcys. Organizeju tikšonuos, koncertus, dažaidus pasuokumus, pi myusu īsarūn eipaši gosti. Kaidam ir juopopularizej latviskais i es asmu uzajiems itū pīnuokumu. Es naasu vīneigais Latvejis gūda konsuls ASV, mes asam 18. Kotru godu Latvejis gūda konsuli sasateik Vašingtonā, tod mes ziņojam, kū kotrys asam izdarejs īprīkšejā godā kulturys aktivitašu i biznesa veicynuošonai. Izveidojam kūpeigu planu nuokušajam godam, dolamēs idejuos i vuicamēs vīns nu ūtra. Myusim ir lels paziņu lūks, mes raugom popularizēt Latveju i veicynuot juos atpazeistameibu, mes asam daļa nu diplomatiskuo korpusa.

Uorlītu ministrejai myusus vajag, gūda konsuli vysys aktivitatis dora kai breivpruoteigī i poši ari finansej. Latvejā ASV ir tikai vīna viestnīceiba Vašingtonā. Myusim, gūda konsulim, ir eipašs statuss i mes asam īsaisteiti dažaidu vaicuojumu rusynuošonā, kas ir saisteiti ar imigraceju, adopcejis vaicuojumim, biznesa veicynuošonu i cytim.

Var saceit, ka tu esi latvīšu kūpīnys centrys Hjūstonā. Cik lela ir latvīšu kūpīna i kū jius dorot?

Kūpīna, kas regulari sasateik divys reizis godā, ir ap 80 cylvāku. Goda leluokais nūtykums ir Latvejis proklamiešonys dīnys svineibys, mes labi pavodom laiku, dzīžam Latvejis himnu, sokom runys. Paguojušajā godā beja eipašys svineibys par gūdu Latvejis symtgadei. Itymā godā suocem reikuot latvīšu filmu vokorus, iz tim sasapuļcej 15–20 cylvāku, filmom ir subtitri angļu volūdā, partū var saprast vysi. Myusim ir ari sasatikšonys ar gostim, pimārām, gostūs ir bejuse vejūlneica Baiba Skride, viestnīks. Kod viņ Hjūstonā ir kaids interesants gosts, reikoju pījimšonu. Ik godu ir ap 10 pasuokumu.

Kai ir ar latgalīšim Hjūstonā?

Atrast latgalīšus maņ nadaudz ir bejs kai detektiva dorbs. Kod es īsapazeistu ar jaunu cylvāku, es vysod raugu nūskaidruot, nu kurīnis ir jis i juo seņči. Hjūstonā ir ostoni cylvāki, kurim vacuoki ci vacvacuoki ir nu Latgolys. Eistineibā jau latgalīšu saīt vaira, ap 22 cylvāku, kurim ir latgalīša DNS, kaidam 50%, kaidam 25%. Daudzim nu myusu ir bārni, mozbārni i beiguos saīt vaira cylvāku ar saknem Latgolā. Es saceitu, ka mes asom 3,1 cylvāks, kas runoj latgaliski.

Tys 0,1 cylvāks, kas runoj latgaliski, esi tu?

Nui!

Kod tu beji mozeņš, tu runuoji latgaliski, piečuok volūdu aizmiersi. Kas nūtyka?

Es dūmoju, ka mes saimē runuojom sajaukumu storp latgalīšu i latvīšu volūdu. Cik es varu atguoduot, muni vacuoki runuoja latgaliski. Piļneigi drūsai, ka muni vacvacuoki runuoja tikai latgaliski. Ruodīs, ka da kaidu četru godu es runuoju latgaliski, tod es aizguoju vuiceitīs iz pamatškolu, kurā vuiceibys nūtyka tikai angļu volūdā. Volūda pamozom aizamiersa. Pat, ka tu pats puorstuoj runuot latvyski, īmi amerikaņu školā, tev ir amerikaņu draugi, skaiti amerikaņu gruomotys, verīs muļcikus, tev jūprūjom fonā ir latvyskais.

Maņ ruodīs sovaiž, ka ir īspiejams aizmierst volūdu.

Bet tys ir cīši izplateiti. Es asmu skaitejs daudzi teorejis par itū. Byudams gūda konsuls, es runojūs ar daudzim vacuokim, kuri kūpā ar bārnim gastej munā sātā. Daži bārni runoj tikai angliski, cyti runoj obejis volūdys. Tys atkareigs nu muotis i tāva, ka obeji vacuoki ir latvīši, tys ir vīnkuoršuok, ka latvīts ir tikai vīns nu vacuoku, ir gryušuok.

Byudams bārns, tu runoj latgaliski ci latvyski, tod tu nūkliusti angļu volūdys vidē, angļu volūda tev ir apleik nu vysu pušu. Tod nūteik psihologiska muotis volūdys blokiešona, jo tu gribi panuokumus, byut izcyls angļu volūdā, byut bez akcenta, byut pījimts kulturā. Itei teoreja varātu byut vīns nu izskaidruojumu. Atgiut muotis volūdu atpakaļ palīk gryuši.

Kai tev niu veicās ar latvīšu literaruos i latgalīšu rokstu volūdys vuiceišonūs?

Saleidzynojūt ar laiku četrus pīcus godus atpakaļ, es niu jiutūs daudz komfortabluok. Es jūprūjom vēļ nauzadrūsynoju runuot. Maņ nav problemu nūskaiteit nu papeira runu latvyski ci latgaliski, muna izruna, prūtams, nav perfekta. Da šam asmu kaidys devenis runys sacejs latgaliski i vīnu latvīšu literarajā volūdā. Es jūprūjom naasu apmekliejs volūdys apgivis kursus ar konkretu vuiceibu programu. Es sasazynoju ar daudzim cylvākim, izmontojūt Google Translate (red. pīzeime: tulkuošonus reiks). Kotru nedeļu īsavuicu kaidu pīcus jaunus latgalīšu volūdys vuordus nu cylvāku, ar kurim sasazynoju. Tys īt lānai.

Tu esi daļa nu latgaliskuo kusteibys. Kai itei kusteiba izaver nu tuos okeana pusis?

Sevkurs, kurs ir latgaliskajā kusteibā, var justīs lapnys par tū. Niu ir bolva “Boņuks”, ir dokumentaluos filmys, gruomotys, muzyka. Tys vyss cīši īprīcynoj. Es dūmoju, ka itei ir cīši emocionala i spieceiga kusteiba. Pamatā dažaiduos aktivitatēs ir vīni i tī poši cylvāki, pīsavīnoj ari kaidi jauni cylvāki. Es raugu atbaļsteit itū kusteibu.

Es jūprūjom dūmoju, ka latvīši latgaliskū da gola nav nūviertiejuši. Tys drūši viņ ir ari īmeslis, deļkuo tei ir kusteiba i vysod taida ari bejuse. Volūdys saglobuošona, kod ir cyta dominejūšuo volūda, vysod ir ceiņa. Poši latgalīši daudz kū dora. Tod ir vaicuojums par vaļsts atbolstu, itūšaļt latgaliskajam nav eista vaļsts atbolsta. Volūda nav školuos, kai tys beja 20. godu symta 20. i 30. godūs. Ka volūdu navuica školuos, vysod ir risks. Nasaverūt, ka atbolsta nav jau 85 godus, latgalīšu volūda ir izdzeivuojuse. Latgalīši ar katuoļticeibu i tradicejom roda nesalaužamu i nasatrycynomu kulturu.

Kas tev vysvaira pateik Latvejā?

Vysod atbraucūt iz Latveju, maņ pateik staiguot pa īlom, klauseitīs cylvākus. Latveja ir moza vaļsts, pasaulī gondreiž napazeistama, bet vysod, kod atbraucu, es apjaušu, ka itei ir dinamiska i moderna vide. Cylvāki ir ļūti labi izgleituoti i profesionali, entuziastiski, eipaši godūs jaunī.

Mes, latvīši, raugim vuiceitīs nu Rītumu, īskaitūt ASV, dažaiduos jūmuos. Kū amerkiani varātu vuiceitīs nu latvīšu?

Es izmontuošu pīmāru nu Baļtejis-Amerikys breiveibys fonda (red. pīzeime: originalvolūdā Baltic-American Freedom Foundation), kurā dorbojūs. Ik godu nu vysu treju Baļtejis vaļstu iz ASV mes praksē nūsyutom ap 60 studentu, mes jim atrūnam dorbavītys. Tī poši dorba devieji turpynoj pi seve jimt studentus nu Baļtejis vaļstu, jo jī ir labi izgleituoti i cīši struodeigi. Dūmoju, ka amerikani var vuiceitīs ciļvieceibu i dorba etiku. Es nasoku, ka amerikani ir slinki, bet es radzu, ka taišni ituos lītys teik nūvārtātys. Kod tu esi nu mozys vītys, tev juostruodoj vaira, lai izveiduotu sovu reputaceju.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.